Sut la batgetta da la Cuminanza da lavur da las regiuns alpinas (ARGE ALP) è vegnì elavurà in document d'iniziativa per ina strategia macroregiunala a favur dal territori alpin. Quest document d'iniziativa ch'il chantun Grischun ha gidà ad elavurar vegn deliberà d'ina conferenza internaziunala da las regiuns alpinas ils 29 zercladur 2012 a Ragaz Bogn.
Il zercladur 2011 ha la Conferenza da las regenzas da la Cuminanza da lavur da las regiuns alpinas concludì a Salzburg ina resoluziun che resguarda il territori alpin sco macroregiun. En quella èsi vegnì fixà che la ARGE ALP resguarda quai sco necessari da lantschar er per il territori alpin il svilup da macroregiuns ch'è vegnì cumenzà da l'Uniun europeica. In onn pli tard vegn ussa salvada ils 29 da zercladur 2012 a Ragaz Bogn – suenter la 43. Conferenza da las regenzas da la ARGE ALP – ina conferenza da las regiuns alpinas, a la quala vegn deliberà il document d'iniziativa per ina "strategia macroregiunala per las Alps" ch'è vegnì elavurà en il fratemp da tut ils pajais, da tut las regiuns e da tut ils chantuns interessads da l'artg alpin. Quest document fixescha la direcziun da las strategias che ston vegnir elavuradas. Il medem mument vegnan las regenzas naziunalas dal territori alpin supplitgadas da sustegnair e da collavurar tar quest project. Ellas vegnan intimadas da s'engaschar a favur d'ina incumbensa dal Cussegl europeic a la Cumissiun europeica che permetta d'elavurar ina strategia per tut il territori alpin, integrond er ils stadis betg commembers sco la Svizra ed il Liechtenstein.
Prender per mauns ils problems sur ils cunfins statals ora
En la "strategia macroregiunala per la Alps" vesan las regiuns participadas ina schanza da prender per mauns las sfidas cuminaivlas en moda pli efficazia e da trair a niz meglier ils potenzials dal territori alpin. Cun concepts ch'èn accordads in cun l'auter po en tscherts secturs tematics vegnir cuntanschì dapli che cun soluziuns naziunalas isoladas. Ils accents dal document d'iniziativa sa chattan en spezial en ils suandants secturs:
- cumpetitivitad ed innovaziun;
- aua, energia, ambient e clima;
- accessibladad, meds da transport e transport.
Gist tar ils temas energia / aua sco er traffic èn dumandadas ozendi strategias che giaudan in grond sustegn. Uschia po la midada a furmas alternativas per producir electricitad la finala mo gartegiar en il rom d'in concept transcunfinal per la producziun, per l'accumulaziun e per la distribuziun d'energia. Medemamain vegnan ils giavischs dal territori alpin en dumondas dal traffic mo observads, sche sias regiuns defendan lur dretgs envers ils stadis ed envers las instituziuns da la UE cun vusch unida. Tar tut ils dus exempels po ina strategia da las Alps purtar success evidents.
La regenza grischuna beneventa las stentas per sviluppar la strategia. Ils ultims mais è il chantun Grischun sa participà activamain a las lavurs da concepziun dal document d'iniziativa.
Glisch verda per il project grischun concernent la schelira permanenta
Avant la conferenza da las regiuns alpinas a Ragaz Bogn tira la Conferenza da las regenzas da la ARGE ALP bilantscha da l'onn da lavur 2011/2012. La ARGE ALP sa fatschenta en emprima lingia cun numerus projects internaziunals, tranter auter dal champ ecologic, cultural, social ed economic. La Conferenza da las regenzas vegn a decider ils 29 da zercladur davart novas propostas da projects da lur commembers.
Il chantun Grischun ha inoltrà in project per eruir l'influenza da la schelira permanenta sin bovas e sin crudadas da crappa. La finamira da project è quella da sviluppar en las muntognas bregagliottas in sistem per localisar e per controllar en gronds spazis instabilitads dal spelm. Observaziuns e mesiraziuns en las muntognas bregagliottas duain ultra da quai infurmar davart la dumonda, tge situaziuns en territoris cun schelira permanenta che chaschunan instabilitads dal spelm e mussar, tge mecanissem che pon chaschunar crudadas da crappa. Il project dura fin mez da l'onn 2015 e stat sut la direcziun da l'uffizi chantunal da guaud e privels da la natira.
Ina survista dals projects currents e dals projects inoltrads da nov da la ARGE ALP po vegnir consultada qua sco document da PDF.
L'onn da lavur 2011/2012 da la ARGE ALP sut il presidi dal chantun Son Gagl aveva il motto "Las Alps: Funtauna d'energia regenerabla". En quest connex ha gì lieu a Son Gagl in dieta d'expertas e d'experts, a la quala vischnancas da tut ils pajais, da tut las regiuns e da tut ils chantuns da la ARGE ALP han mussà lur vias per producir e per duvrar cun success energias regenerablas sco er per arrivar ad in'effizienza energetica pli gronda sin plaun communal. Il Grischun è vegnì represchentà da Landquart a questa dieta (communicaziun dals 4 da matg 2012).
A Ragaz Bogn mida il presidi da la ARGE ALP al stadi federativ austriac dal Tirol. Plinavant pon las commembras ed ils commembers puspè beneventar en lur retschas la regiun taliana da la Lumbardia.
Survista da la Cuminanza da lavur da las regiuns alpinas
La ARGE ALP ha l'intent d'approfundar la conscienza da surpigliar la responsabladad per il spazi da viver alpin, ed ella vul sviluppar vinavant questa conscienza en moda persistenta per il bain da las abitantas e dals abitants. A la cuminanza da lavur, ch'è vegnida fundada l'onn 1972 en il Tirol, appartegnan nov pajais federativs, regiuns e chantuns da quatter stadis. Commembers èn ils chantuns svizzers Grischun, Son Gagl e Tessin, ils pajais federativs austriacs Salzburg, Tirol e Vorarlberg, il pajais federativ tudestg Baviera sco er las regiuns talianas Tirol dal Sid e Trentino. Presidiada vegn la ARGE ALP mintgamai per in onn d'in da ses commembers. La sedia dal secretariat è a Puntina. Il territori da la ARGE ALP cumpiglia ina surfatscha da 118 504 kilometers quadrat ed è il dachasa da 16 milliuns persunas. Ulteriuras infurmaziuns sut: www.argealp.org.
Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01
Gremi: regenza
Funtauna: rg chanzlia chantunala dal Grischun