La regenza grischuna ha deliberà la missiva per abolir il referendum extraordinari da las autoritads per mauns dal cussegl grond. Il dretg da referendum dal parlament che n'è anc mai vegnì duvrà duai uschia vegnir abolì. Decider decidan la finala las votantas ed ils votants.

Fatschentas che suttastattan al referendum facultativ u che tutgan en sia cumpetenza finala po il cussegl grond suttametter a la votaziun dal pievel. Questa opziun ha il parlament grazia al referendum extraordinari da las autoritads, in instrument ch'è vegnì stgaffì a chaschun da la revisiun totala da la constituziun chantunala dal Grischun da l'onn 2003. Fin oz n'ha il cussegl grond dentant anc mai fatg diever da quest dretg. D'applitgar l'instrument ha il cussegl grond però discutà en moda intensiva e cuntraversa en differentas fatschentas – l'ultima giada en la sessiun d'avrigl 2012 a chaschun da la discussiun concernent la lescha davart las taxas turisticas.

En la sessiun da december 2009 è la maioritad dal parlament grischun s'exprimida per l'aboliziun dal referendum extraordinari da las autoritads. D'ina vart saja sa mussà che l'instrument na saja betg stà adattà en la pratica vertenta. Da l'autra vart pledian ponderaziuns constituziunalas e statalpoliticas per l'aboliziun dal referendum.
La missiva da la regenza ch'è ussa avant maun cuntegna ina revisiun parziala da la constituziun chantunala. Ina midada constituziunala suttastat al referendum obligatoric, uschia che las votantas ed ils votants vegnan a decider davart l'aboliziun dal referendum extraordinari da las autoritads.

Il cussegl grond vegn a tractar la fatschenta en la sessiun d'avust 2012. Sch'il pievel accepta la revisiun, duai ella vegnir messa en vigur per il 1. da schaner 2013.


Infurmaziuns:
chancelier Claudio Riesen, chanzlia chantunala dal Grischun, tel. 081 257 22 21


Gremi: regenza
Funtauna: rg chanzlia chantunala dal Grischun