Dals 10 als 16 da settember 2012 preschentan las "Bibliotecas Grischun" a la populaziun dal Grischun puspè ina retscha variada d'occurrenzas. Cun l'emna da las bibliotecas vulan las bibliotecas innovativas render attent a lur purschida multifara e regurdar a las prestaziuns ch'ellas furneschan durant l'onn.

Cun lur emna da las bibliotecas dals 10 als 16 da settember 2012 vulan las "Bibliotecas Grischun" cuntinuar cun il success che questa emna ha gì l'onn passà. Passa 2000 persunas dal Grischun han visità l'onn passà in'occurrenza en ina da las 54 bibliotecas publicas. Las bibliotecas da scola e communalas èn ina part integrala impurtanta d'ina vischnanca ed adempleschan incumbensas da gronda valur. Ellas na disponan betg mo da medias e da savida, mabain èn er partenarias fermas, sch'i sa tracta d'intermediar talas. Sur ina stretga collavuraziun cun las scolinas e cun las scolas consolideschan las bibliotecas lur reputaziun sco partenarias da la furmaziun e sco lieu d'emprender. Las occurrenzas durant l'emna da las bibliotecas mussan che las bibliotecas furman ina spessa rait integrala en il chantun triling e ch'ellas porschan a la populaziun ina vasta tscherna da medias e da servetschs ch'i vala la paina da trair a niz e da promover. Las "Bibliotecas Grischun" èn innovativas e progressivas.
Durant l'onn èn las bibliotecas quellas instituziuns da cultura e da furmaziun che vegnan frequentadas il pli savens en il chantun. Promover la lectura, intermediar la litteratura e las medias sco er promover la cumpetenza d'utilisar ils mediums èn in grond giavisch da "Bibliotecas Grischun". L'organisaziun da las occurrenzas durant l'emna da las bibliotecas duai rinforzar la posiziun da las bibliotecas en il chantun ed en spezial en las vischnancas.

Divertent ed excitant
Durant l'emna da las bibliotecas dals 10 als 16 da settember 2012 han lieu occurrenzas excitantas e divertentas. A Cuira per exempel envida la scola chantunala a "poetry slam" cun l'artist da "spoken word" da renum internaziunal Renato Kaiser, en la biblioteca da la scola professiunala pon ins admirar sculpturas culticas or da cudeschs e la biblioteca chantunala porscha, en collavuraziun cun la biblioteca populara dal Grischun, sut il titel "Wo doppelt schön der Äther blaut" in'occurrenza ironic-seriusa davart il tema da la litteratura en las Alps. Il giast da la biblioteca communala da Domat è Bänz Friedli cun sia producziun "Sy no Frage?", en la biblioteca populara da Mustér raquintan ils musicists Oana e Simon Camartin da lur aventuras, il scriptur e chatschader Leo Tuor legia a Scuol or da sia ovra "Settembrini" ed ils clowns Dodo e Nana procuran per divertiment en la Biblio.ludo.teca La Sorgente a Puschlav. Avais Vus interess? L'entir program cun las bibliotecas participadas da tut las regiuns linguisticas chattais Vus sin www.bibliothekswoche.ch.


Agiunta:
Maletg tar l'emna da las bibliotecas grischunas 2012



Infurmaziuns:
Nelly Däscher, incumbensada da las bibliotecas, biblioteca chantunala dal Grischun, tel. 081 257 28 37


Gremi: uffizi da cultura
Funtauna: rg uffizi da cultura