En sia ultima sesida è la regenza grischuna sa fatschentada tranter auter cun planisaziuns localas da vischnancas.

Da vischnancas e da regiuns 

• Tujetsch: Sin dumonda da la vischnanca da Tujetsch ha la regenza midà e cumplettà ses conclus d'approvaziun concernent la planisaziun d'utilisaziun per il project ch'ella ha prendì ils 29 da november 2011. Ils meds da planisaziun per construir in resort Dieni tar la staziun da val da las pendicularas vegnan adattads sco consequenza d'ina enclegientscha tranter la vischnanca e las organisaziuns per la protecziun da l'ambient. L'adattaziun da la zona da resort "Dieni" cumpiglia d'ina vart in redimensiunament da la surfatscha surbajegiabla e da l'autra vart in'etappaziun da la surbajegiada ch'è fixada en in plan d'areal nov 1:2000 "Resort Dieni". In'ulteriura cumponenta da l'enclegientscha è quella che las organisaziuns per la protecziun da l'ambient retiran il recurs cunter il conclus d'approvaziun dals 29 da november 2011 ch'ellas han fatg tar la dretgira administrativa dal Grischun.
• Favugn: La revisiun parziala da la planisaziun locala, concludida da la vischnanca da Favugn ils 11 da mars 2012, vegn approvada. La revisiun cumpiglia adattaziuns e repassaments da tut ils plans d'utilisaziun. La procedura d'approvaziun per la zona per implants d'energia solara e per tut las determinaziuns dal plan che stattan en connex cun tala vegnan sistidas fin ch'ina regulaziun dal dretg forestal è avant maun. Cun la zona sistida duess vegnir stgaffida la basa per in'ovra electrica solara en la chava da crappa "Calinis" che n'è betg pli en funcziun.
• Lavin: La revisiun parziala da la planisaziun locala, concludida da la vischnanca da Lavin il 1. da favrer 2012, vegn approvada. Cun la revisiun parziala vegn attribuida da nov ina part da la zona da mastergn existenta ad ina zona d'abitar "Pragliver". Tar la zona d'abitar "Pragliver" sa tracti d'ina zona d'abitar cun edifizis d'abitar per la glieud indigena. L'anteriur areal da l'arsenal vegn ultra da quai transferì da la zona da mastergn ad ina zona da lavur e da servetsch.
• Churwalden: A la vischnanca da Churwalden vegn garantida – cun resalva d'ina contribuziun federala – ina contribuziun chantunala da maximalmain 217 404 francs per renovar la via champestra principala da Grida. La vischnanca vegn obligada da pajar 6 pertschient a la contribuziun chantunala.
• Lantsch: A la vischnanca da Lantsch vegn concedida ina contribuziun da construcziun chantunala da 129 000 francs en furma d'ina pauschala per construir ina plazza da pausa e da sport tar il stabiliment da scola dal consorzi da scola primara da la part davant da la Val d'Alvra.
• Valsot: Il conclus da la radunanza communala da la vischnanca fusiunada da Valsot dals 20 d'avrigl 2012 concernent la nova vopna communala vegn approvà. La nova vopna cumbinescha las vopnas da las vischnancas da Ramosch e da Tschlin che vulan fusiunar a la nova vischnanca da Valsot per il 1. da schaner 2013.

 
Gremi: regenza
Funtauna: rg chanzlia chantunala dal Grischun