La regenza grischuna ha avert la consultaziun tar ina revisiun parziala da la lescha davart l'assicuranza da malsauns e la reducziun da las premias. Tras questa revisiun parziala duain vegnir adattadas las premissas per il dretg da survegnir ina reducziun da las premias. Deducziuns fiscalas che n'han betg motivs socials u famigliars na duain avair nagins effects sin il dretg da survegnir ina reducziun.

Tenor la lescha vertenta davart l'assicuranza da malsauns e la reducziun da las premias (LARP) vegnan reducidas las premias da las cassas da malsauns, sch'ellas surpassan ina resalva persunala graduada tenor categorias d'entrada. L'entrada imputabla correspunda a l'entrada imponibla ch'è decisiva per fixar la tariffa plus 20 pertschient da la facultad imponibla ch'è decisiva per fixar la tariffa. Tras questa concepziun da la reducziun individuala da las premias n'han las deducziuns fiscalas betg mo consequenzas per las taglias. Perquai che las deducziuns fiscalas chaschunan in'entrada imputabla pli pitschna, han ellas er ina influenza directa sin il dretg da survegnir ina reducziun da las premias.

Questa problematica duai vegnir schliada tras ina revisiun parziala da la lescha. Deducziuns fiscalas che n'han betg motivs socials u famigliars na duain betg vegnir resguardadas per eruir l'entrada ch'è decisiva per fixar il dretg da survegnir ina reducziun da las premias. Concretamain pertutga quai ils pajaments voluntars ad instituziuns da la prevenziun professiunala, las contribuziuns a la prevenziun liada, ils custs per l'administraziun da la facultad tras terzas persunas, las prestaziuns voluntaras ad organisaziuns d'utilitad publica ed ils custs da reparatura d'immobiglias.

Effect nunintenziunà da l'augment dals imports da facultad libers da taglia sin il dretg da reducziun
Tras la revisiun parziala da la lescha da taglia per il chantun Grischun – ch'è entrada en vigur il 1. da schaner 2010 e ch'è s'effectuada a partir da l'onn 2011 – èn ils imports libers da taglia vegnids augmentads tar la taglia sin la facultad. Quest augment è vegnì fatg oravant tut cun l'intent da render il Grischun pli attractiv sco lieu da domicil per pajataglias bainstants. Cunquai che l'entrada ch'è decisiva per fixar il dretg da survegnir ina reducziun da las premias na vegn betg mo calculada sin basa da l'entrada suttamessa a la taglia, mabain er sin basa da la facultad suttamessa a la taglia, sa reducescha la facultad suttamessa a la taglia, perquai ch'ils imports da facultad libers da taglia èn vegnids auzads, ed uschia sa sminuescha er l'entrada ch'è decisiva per fixar il dretg da survegnir ina reducziun da las premias.

Quest effect nunintenziunà sin il dretg da survegnir ina reducziun da las premias duai medemamain vegnir eliminà. La reducziun da las premias na duai betg pli vegnir calculada sin basa dals novs imports da facultad libers da taglia pli auts, mabain puspè sin basa dals imports da facultad libers da taglia che pudevan vegnir deducids avant la revisiun parziala da la lescha da taglia.

Remartga:
La consultaziun dura fin ils 31 da schaner 2013. Ils documents da consultaziun stattan a disposiziun sin www.gr.ch (publicaziuns / consultaziuns).


Infurmaziuns:
- cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01
- dr. Rudolf Leuthold, manader da l'uffizi da sanadad, tel. 081 257 26 41


Gremi: regenza
Funtauna: rg chanzlia chantunala dal Grischun