En sia ultima sesida ha la regenza tractà diversas fatschentas communalas e regiunalas. 

Approvà l'engrondiment da l'ovra electrica d'aua da dotaziun Pradella
Il project da las Ovras electricas d'Engiadina SA per engrondir l'ovra electrica d'aua da dotaziun Pradella sco er la concessiun dal dretg da las auas che la vischnanca da Scuol ha dà per duvrar supplementarmain l'aua da surscul da la serra vegnan approvads. Il project prevesa da remplazzar il stabiliment da dotaziun existent Pradella tras in'ovra electrica d'aua da dotaziun. Per quest intent vegn construida al medem lieu ina centrala da dotaziun extendida. L'ovra electrica vegn integrada en la serra existenta. Spetgada vegn ina producziun d'electricitad da 2,5 fin 2,8 uras da gigawat. I vegn fatg quint cun custs d'investiziun da totalmain var 4,4 milliuns francs. 
 

Da vischnancas e da regiuns 

• Savognin: La revisiun totala da la planisaziun locala, concludida ils 12 da mars 2012 da la vischnanca da Savognin, vegn approvada per gronda part. La procedura d'approvaziun per la zona per edifizis e per stabiliments publics "La Nars" (territori "Sot Curtegns") vegn sistida fin ch'il concept regiunal d'abitadi da la regiun dal Grischun central ed in'evaluaziun dal lieu per il center da sport "La Nars" èn avant maun. Tenor il model directiv da la vischnanca da Savognin duain vegnir stgaffidas purschidas da temp liber e da recreaziun en il territori "Sot Curtegns". La vischnanca ha laschà elavurar in studi per in project preliminar che prevesa en quest territori in stabiliment da sport d'enviern e da temp liber cun ina plazza da glatsch, ina plazza da curling ed ina plazza da tennis sco er cun ulteriurs indrizs infrastructurals.
• Tusaun: A la vischnanca da Tusaun vegn garantida ina contribuziun chantunala da construcziun pauschala da 359 600 francs per engrondir la chasa da scola Compogna. 

Projects da vias
La regenza ha prendì ils suandants conclus davart projects da vias:
- H27 via d'Engiadina: Il project d'execuziun per la correcziun da via H27, Giarsun – Ardez vest, engrondiment da la deponia Tars 1, vegn approvà.
- H19 via sursilvana: Il preventiv dals custs actualisà per la correcziun da via H19, Trin Mulin – Felsbach, da 15,8 milliuns francs vegn approvà.
- H28c via dal pass dal Fuorn: Il preventiv dals custs per la correcziun da via H28c, Zernez – Ova dal Sagl, da 14,4 milliuns francs vegn approvà. 
 

Gremi: regenza
Funtauna: rg chanzlia chantunala dal Grischun