Mesemna, ils 6 da favrer 2013, ha lieu en tut la Svizra il test annual da las sirenas: las 13.30 il "alarm general" e las 14.15 il "alarm dad aua". Cun ils tests da las sirenas vegn d'ina vart controllada la prontezza da funcziun da las sirenas e da l'autra vart po la populaziun emprender d'enconuscher ils differents signals d'alarm, cun ils quals ella vegn alarmada en cas da privel acut. 

1. Alarm general
Il "alarm general" vegn dà en tut il chantun da las vischnancas, e quai a las 13.30. A las 14.00 vegn dà anc ina giada il "alarm general" en tut il chantun. Quest alarm serva ad examinar il telecumond da la sirena.
Il "alarm general" è in tun urlant che va si e giu e che dura ina minuta. I na ston vegnir prendidas naginas mesiras da cumportament e da protecziun.
Sch'il signal "alarm general" resuna però ordaifer la controlla da las sirenas annunziada, vul quai dir ch'ina periclitaziun da la populaziun saja pussaivla. En quest cas duai la populaziun tadlar radio, suandar ils avis da las autoritads ed infurmar las vischinas ed ils vischins. 

2. Alarm dad aua
Il "alarm dad aua" vegn dà cun las sirenas da l'alarm dad aua a las 14.15. I sa tracta d'in tun bass interrut regularmain che dura sis minutas. I na ston vegnir prendidas naginas mesiras da cumportament e da protecziun. L'alarm dad aua resuna mo en l'intschess da mirs da fermada. Dals plans da fugia en cas d'alarm dad aua pon ins prender invista tar questas vischnancas. 
Sch'il signal "alarm dad aua" resuna però ordaifer la controlla da las sirenas annunziada, vul quai dir ch'ina periclitaziun da la populaziun saja pussaivla. En quest cas duai la populaziun bandunar immediatamain il territori periclità.

Ulteriuras infurmaziuns e reglas da cumportament sa chattan sin las ultimas paginas da mintga cudesch da telefon sin il fegl d'infurmaziun "alarm da la populaziun”. Niev san ins era mirar sin il Teletext, pagina 662, e sil internet www.sirenentest.ch. La populaziun vegn supplitgada d'avair chapientscha per las dischagreabladads en connex cun las controllas da sirenas. 
 

Infurmaziuns:
Hans Gasser, parsura Uffizi da militar e da protecziun civila, Tel. 081 257 35 22, E-Mail hans.gasser@amz.gr.ch  
 

Gremi: uffizi da militar e da protecziun civila
Funtauna: rg uffizi da militar e da protecziun civila