La cumissiun dal cussegl grond per economia e taxas ha predeliberà la missiva da la regenza tar la garanzia e tar la nova organisaziun da la plazza aviatica regiunala da Samedan e sustegna unanimamain las propostas da la regenza. Il cussegl grond vegn a tractar la fatschenta en la sessiun da favrer 2013. 

Cun la missiva dals 22 d'october 2012 suttametta la regenza al cussegl grond ils bains immobigliars dal chantun ch'èn situads en il perimeter PSIA (= plan secturial "infrastructura da l'aviatica") da la plazza aviatica regiunala da Samedan e propona d'als transferir da la facultad da finanzas a la facultad administrativa, per als pudair alura metter a disposiziun gratuitamain en il dretg da construcziun durant 40 onns ad ina societad d'infrastructura da dretg public autonoma dal circul da l'Engiadin'ota. En il rom da la nova organisaziun da la plazza aviatica regiunala da Samedan vegn questa societad ad affittar ils stabiliments d'infrastructura ad ina gestiunaria privata da la plazza aviatica (Engadin Airport SA). Sut la direcziun dal president da la cumissiun Roger Vetsch ha la cumissiun dal cussegl grond per economia e taxas (CET) predeliberà il project per mauns dal cussegl grond. A la sesida è er sa participà il cusseglier guvernativ Mario Cavigelli.

La cumissiun è sa laschada declerar il nov model d'organisaziun e las relaziuns giuridicas. Ella renconuscha la necessitad da far quest pass. Suenter che las cundiziuns generalas sin la plazza aviatica da Samedan èn sa midadas pertutgant il sectur dal dretg aviatic durant ils ultims onns, pervia da las cundiziuns da l'uffizi federal d'aviatica civila (UFAC), n'è la gestiunaria actuala, ch'è er en possess dals stabiliments d'infrastructura, betg pli en cas da realisar ils meds finanzials ch'èn necessaris per l'infrastructura da la plazza aviatica. Da quai è ussa resultà il nov model d'organisaziun che separa ils stabiliments d'infrastructura giuridicamain ed organisatoricamain da la gestiunaria da la plazza aviatica. L'obligaziun ch'ina organisaziun da dretg public mettia a disposiziun l'infrastructura duai garantir che l'Engiadin'ota vegn colliada cun il traffic aviatic durablamain e per gronda part independentamain da l'andament da las fatschentas da la gestiunaria privata. Grazia al nov model po a medem temp il maun public influenzar pli fitg il svilup giavischà da la plazza aviatica.

Sin fundament da l'impurtanza da la plazza aviatica da Samedan che sa chatta entamez ina da las destinaziuns turisticas las pli grondas e che demussa ina da las valurisaziuns las pli grondas da la Svizra, recumonda la cumissiun per economia e taxas al cussegl grond unanimamain d'acceptar il project e da consentir a las propostas da la regenza. Il cussegl grond vegn a tractar la fatschenta en la sessiun da favrer 2013. 
 

Infurmaziuns:
president da la cumissiun Roger Vetsch, tel. 079 353 50 48


Gremi: cumissiun per economia e taxas
Funtauna: rg cumissiun per economia e taxas