En sia ultima sesida ha la regenza grischuna approvà divers projects communals da la planisaziun d'utilisaziun ed autras fatschentas. 

Da vischnancas e da regiuns

• Furna: La revisiun totala da la planisaziun locala, concludida da la vischnanca da Furna ils 17 da settember 2010, vegn approvada cun correcturas ed excepziuns. Intginas parts da questa revisiun ha la regenza approvà anticipadamain ils 18 d'avrigl 2011.
• Cauco: La revisiun parziala da la planisaziun locala da la vischnanca da Cauco, concludida ils 27 da schaner 2013, vegn approvada. Cun la revisiun parziala vegn stgaffida tranter auter ina zona speziala cun l'intent da realisar ina chascharia e mazlaria da demonstraziun a Bodio.
• Trin: La revisiun parziala da la planisaziun locala da la vischnanca da Trin, concludida ils 17 da november 2012, vegn approvada. Ella cumpiglia la determinaziun da novas zonas da privel per la vischnanca che vegnan surpigliadas en la planisaziun da zonas.
• Cuira: A la citad da Cuira vegn garantida ina contribuziun da tut en tut maximalmain 206 250 francs (mintgamai per la mesadad dal chantun e da la confederaziun) al project "Manaschament regiunal 2013-2015", e quai en il rom da la nova politica regiunala da la confederaziun (NPR). La citad da Cuira maina da nov in post da contact per finamiras da l'economia. Quest post da contact vegn cumbinà cun il post dal svilup regiunal NPR per il spazi economic funcziunal Grischun dal nord. Per quest intent vegn stgaffida ina plazza a temp cumplain che serva mintgamai per la mesadad a las duas funcziuns svilup da la citad e svilup regiunal.
• Claustra-Serneus: Il project "Avertura Gotschna" da la vischnanca da Claustra-Serneus vegn approvà. I vegn garantida ina contribuziun da maximalmain 2 638 400 francs. Ils guauds en il territori da Gotschna tranter Ried e la chavorgia Dros èn determinads per gronda part sco guauds da protecziun. Ultra da quai han quests guauds in grond potenzial per l'utilisaziun da la laina. Igl è dentant necessaria ina meglra avertura. Il project cumpiglia la construcziun da vias da guaud resp. d'ina via da maschinas d'ina lunghezza da totalmain 4395 meters.
• Claustra-Serneus: Ils custs supplementars en la dimensiun dad 840 000 francs che resultan dals projects consecutivs approvads suenter l'aua gronda dal 2005 per la Landquart ed il Schlappinbach da la vischnanca da Claustra-Serneus vegnan approvads. Las raschuns per ils custs supplementars èn la disfatga da mirs da riva, adattaziuns dal project per motivs concepziunals e pervia da la protecziun da regiuns umidas sco er optimaziuns da la protecziun cunter aua gronda.
• Medel/Lucmagn: Il project "Via da guaud Uaul Soliva" da la vischnanca da Medel (Lucmagn) vegn approvà. Als custs vegn garantida ina contribuziun da maximalmain 342 000 francs. Il project cumpiglia l'engrondiment d'ina via charrabla stretga existenta ad ina via da guaud ch'è charrabla per camiuns. Questa via avra il territori dal guaud "Uaul da Soliva" en moda optimala e permetta l'utilisaziun effizienta e la tgira dal guaud.
• Grischun dal nord: L'adattaziun dal plan directiv regiunal "explotaziun da material, deposits da material e deponias" dal Scanvetg, concludida da la corporaziun regiunala dal Grischun dal nord ils 20 da november 2012, vegn approvada.

Contribuziuns chantunalas a differentas instituziuns

• Mazlaria Mark SA: A la mazlaria Mark SA a Schiers-Lunden vegn empermessa ina contribuziun da 25 pertschient als custs per commerzialisar l'introducziun da "Power Beef" ils onns 2013 fin 2017, tut en tut dentant maximalmain 450 000 francs. Per l'onn 2013 èn vegnids garantids 90 000 francs. Las contribuziuns restantas per ils onns suandants 2014 fin 2017 vegnan pajadas sin basa dal progress da commerzialisaziun. Il chantun resalva il dretg da sistir u da revocar las contribuziuns, sche las mesiras da commerzialisaziun na mainan betg a la finamira. La mazlaria vul etablir cun "Power Beef" in snack da charn d'auta qualitad per la societad da sport, da fitness e d'outdoor sin basa da charn-bov dal Grischun. L'idea correspunda al program d'impuls chantunal "Spezialitads dal Grischun" per augmentar la valurisaziun en l'agricultura ed en l'economia da nutriment dal Grischun.
• Arosa cultura: A l'uniun Arosa cultura (avant: circul cultural Arosa) vegn empermessa ina garanzia da deficit da totalmain 65 000 francs per duas occurrenzas che han lieu la stad/l'atun 2013 (50 000 francs per las emnas da curs da musica e 15 000 francs per l'academia da musica).

Projects da vias
La regenza ha approvà 4 602 000 francs per lavurs da construcziun sin ils suandants trajects:
- via d'Engiadina: lavurs da cuvrida, sviament da Scuol
- via da Sursaissa: lavurs da cuvrida, Flond – Valata
- via sursilvana: lavurs da cuvrida, Dieni – Tschamut
- via da Fatschel: lavurs d'impressari e da cuvrida, spartavias via dal Scanvetg – Litzi
- via da Ratitsch: lavurs d'impressari, via da Ratitsch, kilometer 0,57 fin 0,95 


Gremi: regenza
Funtauna: rg chanzlia chantunala dal Grischun