Mesemna, ils 23 d'october 2013 vegn averta uffizialmain a St. Peter la nova basa per il mantegniment da las vias da l'uffizi da construcziun bassa, district 1 Cuira. Entaifer in onn èn las localitads insuffizientas vegnidas remplazzadas tras in nov stabiliment funcziunal. 

Il district 1 a Cuira tgira ina rait da vias da 278 km. Da quai èn 58 km vias naziunalas, 56 km vias principalas e 161 km vias da colliaziun. Il territori cumpiglia la Val dal Rain grischuna da La Punt fin al cunfin cun il chantun Son Gagl, il Scanvetg, la via dal Güglia da Cuira fin a Casti e la via sursilvana da la vart dretga dal Rain fin a Versomi e la Val Stussavgia.
Da la basa da St. Peter anora garanteschan totalmain sis collavuraturs il mantegniment architectonic e funcziunal da la via dal Scanvetg da Cuira fin ad Arosa inclusiv las vias lateralas. La situaziun d'enfin ussa n'ha lunschor betg pudì ademplir las pretensiuns d'ozendi. Il fatg che las localitads sa chattavan en differents stabiliments ha difficultà il manaschi per garantir il mantegniment da las vias. Il material ed ils apparats vegnivan deponids en sustas simplas. Al persunal stevan a disposiziun locals da segiurn e gardarobas d'in standard fitg modest.
L'onn 2012 ha il chantun pudì acquistar en la Val Mischein, sin il territori communal da St. Peter (oz vischnanca d'Arosa), in bain immobigliar adattà per construir ina nova basa. Sa basond sin il concept da manaschi e sin il program da spazi da l'uffizi da construcziun bassa è vegnì planisà in edifizi cunvegnent da lain indigen. 

Nova basa per la lavur quotidiana
La realisaziun ha durà in onn. La halla da parcar per ils vehichels, las localitads sanitaras, las localitads da deposit sco er ils locals da segiurn e la gardaroba per ils collavuraturs èn ussa unids sut in tetg. Il stabiliment sa distingua tras ina moda da construcziun funcziunala e persistenta e tras furmas cleras. El correspunda a las pretensiuns actualas envers ina basa moderna e sustegna ils collavuraturs tar lur lavur quotidiana sin via. 
 
Remartga:
Las collavuraturas ed ils collavuraturs da las medias èn envidads a la festa d'avertura da mesemna, ils 23 d'october 2013, a las 16.30, a la quala è er preschent il cusseglier guvernativ dr. Mario Cavigelli. La festa ha lieu en la nova basa St. Peter, Val Mischein (portal da l'ost dal tunnel Clasaurer), 7028 St. Peter. La basa è accessibla a la publicitad interessada a chaschun d'in di da las portas avertas che ha lieu sonda, ils 26 d'october 2013. 
 

Infurmaziuns:
- Markus Dünner, architect chantunal, uffizi da construcziun auta, tel. 081 257 36 31, e-mail: Marku.Duenner@hba.gr.ch  
- Reto Knuchel, schef dal mantegniment da vias, uffizi da construcziun bassa, tel. 081 257 37 35 u 079 629 81 14, e-mail: Reto.Knuchel@tba.gr.ch  


Gremi: uffizi da construcziun auta dal Grischun
Funtauna: rg uffizi da construcziun auta dal Grischun