Ils 18 d'october 2013 ha l'uffizi federal da migraziun serrà suenter stgars 5 mais l'alloschi d'asil Lucmagn sin il territori da la vischnanca da Medel/Lucmagn en il chantun Grischun, sco quai ch'igl era vegnì fixà cun il departament federal da defensiun, protecziun da la populaziun e sport (DDPS), cun il chantun Grischun e cun la vischnanca da Medel/Lucmagn. L'alloschi federal ha pudì vegnir manà per gronda part senza problems. La vischnanca ha apprezià ils engaschaments da lavur dals requirents d'asil.

En il stabiliment èn vegnids collocads l'ultim mez onn circa 55 requirents d'asil per mais. En las vischnancas da Medel/Lucmagn, da Mustér e da Blenio (TI) han ils requirents d'asil han pudì far in bun pau per la communitad: Els han meglierà sendas da viandar ed han tgirà pastgiras e guauds.

La collocaziun dals requirents d'asil sin il Lucmagn n'ha chaschunà nagins problems. Ina gruppa accumpagnanta, che consistiva tant da represchentants da la populaziun sco er da las organisaziuns relevantas, ha procurà ch'ins ha pudì reagir svelt e cun mesiras adattadas a problems pli pitschens.

Durant il manaschi da l'alloschi ha il chantun Grischun pudì far repatriaments en il rom da la procedura da Dublin directamain davent da l'alloschi federal sin il pass dal Lucmagn. L'onn 2014 vegn il chantun a profitar dal fatg ch'i vegnan attribuids al Grischun damain novs requirents d'asil.

Ils posts cumpetents da la confederaziun e dal chantun engrazian a la suprastanza communala ed a la populaziun da Medel/Lucmagn per lur prontezza spontana e per lur servetschaivladad da collocar requirents d'asil en lur vischnanca.

Dapi ils 19 d'october 2013 stat l'alloschi puspè a disposiziun a l'armada. 

Ulteriuras infurmaziuns chattais Vus en l'internet sin www.ejpd.admin.ch.


Fotografia agiuntada:

Scuntrada per la fin (da sanestra): divisiunari Marco Cantieni, Peter Binz, president communal da Medel, Urs von Arb, vicedirectur da l'uffizi federal da migraziun e cusseglier guvernativ Christian Rathgeb, schef dal departament da giustia, segirezza e sanadad dal Grischun, davant la chasa grischa a Cuira.

 
Infurmaziuns:
- cusseglier guvernativ dr. Christian Rathgeb, schef dal departament da giustia, segirezza e sanadad dal Grischun, tel. 081 257 25 01, christian.rathgeb@djsg.gr.ch  
- Marcel Suter, manader da l'uffizi da migraziun e da dretg civil dal Grischun, tel. 081 257 25 21, marcel.suter@afm.gr.ch  
- Gaby Szöllösy, uffizi federal da migraziun, scheffa da l'infurmaziun e da la communicaziun, tel. 031 325 98 80, gaby.szoelloesy@bfm.admin.ch  
 
 
Gremi: uffizi federal da migraziun / departament da giustia, segirezza e sanadad dal Grischun
Funtauna: rg uffizi federal da migraziun / departament da giustia, segirezza e sanadad dal Grischun