L'entir consum d'energia e d'electricitad dal Grischun ha pudì vegnir stabilisà l'onn 2012 envers l'onn precedent. Il consum per persuna è dentant pli aut che quel da la media svizra. Ils motivs èn cunzunt la topografia e las purschidas turisticas. L'uffizi d'energia e da traffic ha fatg per l'emprima giada retschertgas detagliadas davart quest fatg, las ha evaluadas e las ha resumadas en in rapport.

Il monitoring d'energia dal Grischun serva a realisar la lescha d'energia dal chantun Grischun da l'onn 2011 ed il rapport da la regenza davart la politica d'electricitad dal chantun Grischun, inclusiv las finamiras ch'èn cuntegnidas en quel, e quai resguardond in provediment d'energia dal chantun segir, rentabel ed ecologic. Mintga onn vegn fatg in rapport da monitoring, ch'è orientà essenzialmain als fatgs e che permetta da valitar il success sin la via da cuntanscher las finamiras. En in turnus da 4 onns vegn suttamess al cussegl grond in rapport cumplessiv che duai identifitgar ils impediments ed ils motivs persuenter. Per lescha è la regenza envidada d'instradar mesiras per meglierar il fatg che las finamiras vegnian cuntanschidas en cas ch'ellas vegnissan manchentadas. 

Stadi intermediar dals resultats
Il rapport qua avant maun davart il monitoring d'energia 2012 mussa in'emprima situaziun ed in emprim svilup detaglià dal consum d'energia en il Grischun. Tendenzas definitivas n'èn anc betg vesaivlas, perquai ch'ins ha registrà mo las datas dals onns 2011 e 2012. Tuttina sa laschan deducir gia oz emprimas experientschas.
L'entir consum d'energia per persuna è en il Grischun, en cumparegliaziun cun il rest da la Svizra, fin 10 pertschient pli aut. Quai ha per part motivs topografics, perquai ch'il consum d'energia dependa fermamain dal clima en las regiuns autalpinas. Plinavant influenzeschan dentant er il turissem e las prestaziuns che stattan en connex cun quel (telefericas, hotels, abitaziuns secundaras e.u.v.) sensiblamain il consum. Cun ina correctura climatica, q.v.d. resguardond il clima vertent, per ch'ils singuls onns possian vegnir cumparegliads in cun l'auter, è il consum d'energia dals onns 2011 e 2012 restà constant.
Il consum d'electricitad ch'è en cumparegliaziun cun la media svizra per circa 20 pertschient pli aut en il Grischun na po anc betg vegnir giuditgà definitivamain. Ina decleraziun pussaivla pudessan esser ils stgaudaments electrics ch'i dat surproporziunalmain. Per l'autra pudessan avair ina influenza er ils manaschis turistics (hotellaria, telefericas, indrizs d'ennavar e.u.v.). La finamira da la regenza grischuna da stabilisar il consum d'electricitad al stadi da l'onn 2011 resp. da na betg laschar augmentar il consum a passa 2000 uras da gigawatt è dentant vegnì cuntanschì l'onn 2012.
L'emissiun da CO2 per abitanta u abitant vegn inditgada per l'onn 2012 cun ina valur ch'è per circa 25 pertschient pli auta ch'en il rest da la Svizra. Quai sa lascha declerar da la situaziun topografica, da las purschidas che stattan en connex cun il turissem, dal grad pli pitschen dal provediment da gas ed en spezial da l'industria da cement. 

Ils programs da promoziun fan effect
Ils programs da promoziun ch'èn vegnids introducids il 1. da schaner 2011 fan per fortuna l'effect giavischà. Il mument pon ins partir dal fatg che las finamiras tenor la lescha d'energia da reducir e da substituir l'energia per l'onn 2015 pon vegnir cuntanschidas.
Il chantun Grischun promova en ils secturs abitar e lavurar l'utilisaziun effizienta da l'energia ed il diever da las energias regenerablas sco la chalur da l'ambient, ils implants solars u la chalur a distanza. En la mobilitad vul el cuntanscher ina midada pli intensiva dal traffic individual al traffic public ed impunda per quai ina purschida attractiva da vehichels ecologics.
Per resumar pon ins constatar ch'il Grischun è sin buna via er en vista a la vieuta energetica ch'ins vul cuntanscher. 
 

Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch  
- Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch
- Andrea Lötscher, manader da la partiziun "effizienza energetica", uffizi d'energia e da traffic, tel. 081 257 36 30, e-mail Andrea.Loetscher@aev.gr.ch  
 

Gremi: departament da construcziun, traffic e selvicultura
Funtauna: rg departament da construcziun, traffic e selvicultura