La regenza grischuna ha decidì da desister d'in mandat en il cussegl da fundaziun da l'Agentura da novitads rumantscha (ANR). En sia ultima sesida ha ella plinavant tractà diversas fatschentas communalas e regiunalas. 

Il chantun desista d'in mandat en il cussegl da fundaziun da l'Agentura da novitads rumantscha
Per il 1. da fanadur 2014 remetta il chantun Grischun ses mandat en il cussegl da fundaziun da l'Agentura da novitads rumantscha (ANR). L'Agentura da novitads rumantscha è vegnida fundada l'onn 1996 per furnir als meds da massa (stampads) rumantschs ina purschida fundamentala da texts e da maletgs. La fundaziun vegn finanziada per gronda part tras contribuziuns annualas da la confederaziun e dal chantun. Dal cumenzament ennà ha il chantun delegà in represchentant en il cussegl da fundaziun. L'emprim è quai stà il schef dal departament d'educaziun, cultura e protecziun da l'ambient, pli tard il schef da l'uffizi da cultura e dapi l'onn 2003 l'incumbensà per dumondas da linguas tar l'uffizi da cultura.
Ils ultims onns ha il chantun mess sin ina nova basa la collavuraziun cun instituziuns che survegnan subvenziuns. Tenor la legislaziun po il chantun far valair ses dretg da cogestiun en il rom da las incaricas da prestaziun. 
 
Projects da votaziun dals 18 da matg 2014
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia dals 18 da matg 2014:
- conclus federal davart il provediment medicinal da basa (cuntraproposta directa a l'iniziativa dal pievel "Gea a la medischina da famiglia")
- iniziativa dal pievel "Per che pedofils na lavurian betg pli cun uffants"
- iniziativa dal pievel "Per la protecziun da salaris gists (iniziativa per salaris minimals)"
- lescha federala davart il fond per cumprar l'aviun da cumbat Gripen (lescha dal fond Gripen)
Quest di na vegni votà davart nagins projects da votaziun chantunals. Percunter han lieu ils 18 da matg 2014 las elecziuns da renovaziun da la regenza e dal cussegl grond ed en singuls circuls er las elecziuns da renovaziun da las autoritads cirquitalas. 
 

Da vischnancas e da regiuns 

• Panaduz: Il chantun Grischun venda la chamona da stradins Spitg a la vischnanca politica da Panaduz. Il pretsch da cumpra importa 49 000 francs. La vischnanca vul acquistar la chamona per intents turistics e per finamiras communalas internas. La chamona è situada en vischinanza directa da la plattafurma panoramica Spitg e perquai la vuless la vischnanca er metter a disposiziun a l'uniun "Die Rheinschlucht / Ruinaulta", ch'è vegnida fundada l'onn 2010, sco staziun intermediara per visitas guidadas tras la Ruinaulta.
• Bregaglia: A la vischnanca da Bregaglia vegn garantida ina contribuziun da maximalmain 189 607 francs per colliar l'aua persa da la fracziun Casaccia, traject Crot fin Borgonovo.
• Trimmis: La revisiun parziala da la planisaziun locala ch'è vegnida concludida da la vischnanca da Trimmis ils 9 da december 2013 e che cumpiglia in plan general d'avertura 1:500 "Revisiun parziala Birkaweg" vegn approvada.
• Tujetsch: Per la vischnanca da Tujetsch vegnan approvads ils custs supplementars da 95 000 francs ch'èn vegnids chaschunads da l'aua gronda e ch'èn vegnids duvrads per reparar ils rempars dal Drun. Per ils custs supplementars budgetads vegnan permessas las medemas tariffas da subvenziun sco per ils custs dal project budgetads oriundamain. A la vischnanca da Tujetsch vegn garantida ina contribuziun chantunala da 23 750 francs.
• Val S. Pieder: La revisiun parziala da la planisaziun locala, che la vischnanca da Val S. Pieder ha concludì ils 24 da november 2013, vegn approvada. Igl èn vegnids deliberads ils suandants meds da planisaziun: plan da zonas 1:2000 "Zona d'explotaziun Jossagada", plan general da furmaziun 1:1000 "Zona d'explotaziun Jossagada", plan general da furmaziun: profils, zona d'explotaziun Jossagada e plan general d'avertura 1:2000 "Zona d'explotaziun Jossagada".

Projects da vias
Ultra da quai ha la regenza approvà 6,315 milliuns francs per lavurs da construcziun sin ils suandants trajects:
- H27, via d'Engiadina: lavurs d'impressari Punt Ota ed allontanament da terren
- H27, via d'Engiadina: lavurs d'impressari reparaziun da la punt da la Val Prauost
- A28, via naziunala Partenz: furniziun, montascha e messa en funcziun da ventils per aria sortinta en il palantschieu intermediar, sviament da Küblis 


Gremi: regenza
Funtauna: rg chanzlia chantunala dal Grischun