Sin invit da la regenza ha l'ambassadur da l'Italia en Svizra, Cosimo Risi, visità oz il chantun Grischun. Tar la visita ha pudì vegnir preschentà in futur segirà per il spurtegl consular a Cuira.
A chaschun da sia visita dad oz a Cuira è l'ambassadur da l'Italia a Berna, Cosimo Risi, vegnì accumpagnà dal schefsecretari Joel Melchiori, manader dal biro da migraziun da l'ambassada. Ils giasts èn vegnids retschavids en la Chasa grischa dal president da la regenza Mario Cavigelli e dal chancelier Claudio Riesen. Suenter il barat dals salids uffizials è in gentar cuminaivel stà sin il program.
La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns externas dal chantun. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas.
A la scuntrada dad oz è vegnì discutà actualmain il mantegniment dal spurtegl consular talian a Cuira. Sco che l'ambassadur Cosimo Risi ha infurmà, po il spurtegl consular a Cuira vegnir manà vinavant er suenter in'eventuala serrada dal consulat talian a Son Gagl. Il chantun Grischun appartegness alura da nov al territori da cumpetenza dal consulat general a Turitg, il spurtegl consular a Cuira fiss però occupà sco adina il venderdi. Las uras d'avertura dal spurtegl consular a Cuira èn vegnidas adattadas: da nov è il spurtegl avert il venderdi er sur mezdi, numnadamain da las 10.00 fin las 14.00.
Il president da la regenza Mario Cavigelli è stà cuntent ch'ina soluziun ha pudì vegnir chattada en l'interess dals var 10 000 burgais talians en il Grischun. Er per il chantun sco er per las interpresas pitschnas e mesaunas saja la partiziun consulara qua a Cuira in post da contact impurtant. Er sche la serrada dal consulat talian a Son Gagl fiss deplorabla, ha pudì vegnir chattada ina buna soluziun, almain or da l'optica dal Grischun. La pussaivladad da profitar dals servetschs consulars na vegnia betg reducida envers oz.
Fotografia agiuntada:
L'ambassadur talian Cosimo Risi (entamez) vegn beneventà en la Chasa grischa a Cuira dal president da la regenza Mario Cavigelli e dal chancelier Claudio Riesen. (a dretga)
Infurmaziuns:
president da la regenza Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail
Mario.Cavigelli@bvfd.gr.ch
Gremi: regenza
Funtauna: rg chanzlia chantunala dal Grischun