A chaschun dals examens d'admissiun chantunals per il gimnasi sco er per la scola media spezialisada e commerziala han 540 scolaras e scolars pudì sa legrar ils ultims dis e las ultimas emnas d'ina decisiun d'examen positiva. Ils examens d'admissiun dals 11 da favrer e dals 18 da mars 2014 han pudì vegnir realisads senza incaps en tut ils lieus d'examen.

Ils examens d'admissiun chantunals per entrar en il gimnasi sco er en la scola media spezialisada ed en la scola media commerziala han gì lieu er quest onn il medem temp en ils differents lieus da scolas medias. Suenter che 840 candidatas e candidast èn vegnids dumbrads l'onn passà, han tut en tut 827 scolaras e scolars empruvà questa primavaira da far cun success ils examens d'admissiun a las scolas medias grischunas. Entant ch'il dumber da las annunzias per l'examen d'admissiun en la 1. classa dal gimnasi da lunga durada è stà passa 10 pertschient sut quel da l'onn precedent, ha pudì vegnir registrà in augment da las annunzias per l'uschenumnà examen unifitgà per l'entrada en la 3. classa dal gimnasi da lunga durada sco er per l'entrada en la 1. classa da la scola media spezialisada u commerziala.
Da las 382 scolaras e scolars primars che han absolvì ils 11 da favrer 2014 in examen d'admissiun per la 1. classa dal gimnasi da lunga durada, han 238 fatg quel cun success. La quota da success sa chatta cun quai sur quella da l'onn passà, cur che 243 da 433 candidatas e candidats han pudì realisar in resultat d'examen positiv suenter la terminaziun da la procedura d'admissiun.
Ils 18 da mars 2014 ha gì lieu l'examen unifitgà, per il qual eran s'annunziads 445 scolaras e scolars. Da quels han 188 ademplì ils criteris d'admissiun per l'entrada en la 3. classa gimnasiala. Ulteriuras 114 scolaras e scolars èn sa qualifitgads per l'entrada en la 1. classa da la scola media spezialisada u commerziala. Tar l'examen unifitgà la primavaira 2013 avevan 185 da 413 scolaras e scolars examinads ademplì las pretensiuns da la procedura d'admissiun per entrar en la 3. classa dal gimnasi e 96 candidatas e candidats avevan survegnì ina decisiun positiva per entrar en la scola media spezialisada u commerziala. Cun quai èn las cifras d'admissiun absolutas da quest onn in zic pli autas che quellas da l'onn precedent. La quota da success per entrar en la 3. classa gimnasiala è percunter in zic pli pitschna che quella da l'onn precedent. Tar l'admissiun a la 1. classa da la scola media spezialisada u commerziala sa chatta ella percunter sur quella da l'onn precedent.
Las gimnasiastas ed ils gimnasiasts futurs pon cumenzar cun lur scolaziun ad ina scola media grischuna gia l'onn da scola vegnint. Ils giuvenils ch'èn sa decidids da far ina scolaziun en ina scola media spezialisada u commerziala ston ademplir il temp da scola obligatoric avant ch'els pon cumenzar cun l'autra scolaziun. Per regla vegnan ellas ed els ad entrar en ina scola media grischuna pir per il cumenzament da l'onn da scola 2015/16. 


Infurmaziuns:
dr. Hans Peter Märchy, manader da l'uffizi per la furmaziun media-superiura, tel. 081 257 61 65, e-mail: Hans.Peter.Maerchy@ahb.gr.ch  


Gremi: uffizi per la furmaziun media-superiura
Funtauna: rg uffizi per la furmaziun media-superiura