Suenter in temp da planisaziun da circa 1 onn èn vegnidas cumenzadas oz las lavurs da construcziun per sanar il center da furmaziun per il guaud a Maiavilla. La sanaziun custa 7 milliuns francs.

Il center da furmaziun per il guaud a Maiavilla (anteriura Scola interchantunala da selviculturs) è vegnì installà tranter ils onns 1974 e 2007. L'edifizi principal è vegnì construì da l'architect Andres Liesch, Cuira, ed è vegnì engrondì trais giadas fin ussa. Ils singuls edifizis demussan in basegn da sanaziun pervia da lur vegliadetgna.
Per la sanaziun integrala dal stabiliment ha la fundaziun "Scola interchantunala da selviculturs Maiavilla" (SISM) sco patruna da construcziun laschà far ina incumbensa da studi en la procedura selectiva la stad 2012. Gudagnà la procedura da concurrenza ch'è vegnida realisada en furma anonima ha in team da project sut la direcziun dals architects Liesch Ott da Cuira.
Il project da construcziun che duai vegnir realisà sa distingua tras ina sanaziun persistenta che resguarda l'edifizi existent e che fascinescha tras soluziuns pragmaticas. La chalur vegn producida tras in stgaudament da stalizzas e tras ina pumpa da chalur. Cun l'implant fotovoltaic planisà po vegnir cuvrì – tut tenor la stagiun – il basegn d'electricitad da tut il manaschi da scola.
Il cussegl da fundaziun da la SISM ha approvà ils 12 da schaner 2012 ils custs totals da 7 milliuns francs per la sanaziun. A quests custs ha il chantun Grischun sco commember dal concordat e sco chantun da staziunament garantì ina contribuziun da construcziun da 2,1 milliuns francs. Igl è planisà da terminar la sanaziun la fin da l'onn 2014. Durant il temp da construcziun vegn il manaschi da scola per part externalisà.

En il rom d'in concordat è vegnida fundada ils 11 d'october 1972 la fundaziun "Scola interchantunala da selviculturs Maiavilla" (SISM). Ils fundaturs èn ils chantuns Uri, Sviz, Sursilvania, Sutsilvania, Glaruna, Zug, Schaffusa, Appenzell dadens, Appenzell dador, Son Gagl, Grischun, Turgovia, Tessin ed il principadi da Liechtenstein. L'intent da la fundaziun è d'instituir e da manar ina scola spezialisada per selviculturas e per selviculturs. En questa scola pon vegnir organisads er auters curs ed autras occurrenzas.
Per incumbensa da la fundaziun SISM maina la scola spezialisada superiura da la Svizra sidorientala (IFSP) en il center da furmaziun per il guaud a Maiavilla (BZWM) ils studis da selvicultura u selvicultur dipl. SSS, da bostgera capolavurera u da bostger capolavurer e da manadra u da manader da crana a cabel sco er differents curs spezialisads davart il guaud. Il BZWM garantescha che la furmaziun forestala a Maiavilla tegnia quint da las pretensiuns e dal svilup en la branscha forestala e ch'ella vegnia rinforzada uschia cuntinuadamain. Ultra da quai garantescha el ch'i stettia a disposiziun als chantuns da fundaziun ed al principadi da Liechtenstein in center da cumpetenza per la scolaziun, per il perfecziunament e per la furmaziun supplementara da lur persunal forestal. Ultra da las localitads da scola e d'instrucziun, d'in guaud instructiv sco er d'indrizs tecnics e da maschinas dispona il BZWM da l'infrastructura necessaria per l'alimentaziun e per l'alloschament da las emprendistas e dals emprendists sco er da las studentas e dals students che derivan dals chantuns fundaturs e dal principadi da Liechtenstein. 


Fotografia agiuntada: Il center da furmaziun per il guaud existent a Maiavilla


Infurmaziuns:
president da la regenza dr. Mario Cavigelli, schef dal departament da construcziun, traffic e selvicultura dal Grischun, president dal cussegl da la fundaziun SISM, tel. 081 257 36 01, e-mail Mario.Cavigelli@bvfd.gr.ch  


Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun