La regenza grischuna ha approvà ina nova cunvegna da prestaziun cun Grischun vacanzas. Ultra da quai ha ella tractà differentas fatschentas da vischnancas e da regiuns. 

Concludì ina nova cunvegna da prestaziun cun Grischun vacanzas
La regenza ha approvà la cunvegna da prestaziun cun Grischun vacanzas per ils onns 2014 fin 2018. La basa per la cunvegna da prestaziun cun il chantun è la strategia 2014 fin 2018 da Grischun vacanzas. Quella sa focussescha sin ina ferma collavuraziun cun las organisaziuns da las destinaziuns sco er cun ulteriurs partenaris sco furnituras e furniturs da prestaziuns u federaziuns en il chantun. Grischun vacanzas sa profilescha en quest connex sco center da servetschs e da cumpetenza. Incumbensas centralas da Grischun vacanzas restan l'elavuraziun da martgads europeics tschernids, il marketing da temas sco er l'elavuraziun da products, la cuntinuaziun e la realisaziun da novs projects en l'eCommerce (plattafurma turistica electronica dal Grischun e center da servetsch eTourismus Grischun) sco er la gestiun da la marca graubünden. Sa basond sin quai ha la regenza fixà las contribuziuns a favur da Grischun vacanzas. Grischun vacanzas survegn sco fin oz ina contribuziun da 6,37 milliuns francs per onn per ademplir l'incarica da prestaziun. La contribuziun annuala per manar la marca graubünden vegn augmentada a 200 000 francs per onn. Resalvada resta la concessiun dals credits tras il cussegl grond. 

Detretschament da las prestaziuns supplementaras e da la reducziun da las premias
La regenza grischuna beneventa ina revisiun parziala da la lescha federala davart las prestaziuns supplementaras tar l'assicuranza per vegls, survivents ed invaliditad che prevesa d'adattar las contribuziuns maximalas per ils custs da locaziun imputabels en las prestaziuns supplementaras (PS). Sco quai ch'ella scriva en sia posiziun a la confederaziun sto vegnir realisada ensemen cun la revisiun da la lescha in detretschament da las prestaziuns supplementaras e da la reducziun individuala da las premias (RIP). Uschia po – tenor la regenza – vegnir anticipà in element impurtant per reducir ils custs ch'è cuntegnì en la revisiun necessaria dal sistem general da las prestaziuns supplementaras.
Oz vegn pajada sur las prestaziuns supplementaras ina premia media chantunala resp. regiunala per l'assicuranza obligatorica per la tgira da persunas malsaunas sco uschenumnada prestaziun minimala. La premia media vegn fixada da la confederaziun. Da nov duain ils chantuns survegnir la cumpetenza da fixar la premia da la cassa da malsauns che po vegnir duvrada per calcular las prestaziuns supplementaras. Ultra da quai duai la procedura per fixar la reducziun individuala da las premias avair lieu separadamain da la calculaziun da las prestaziuns supplementaras. Cun in tal detretschament da las prestaziuns supplementaras e da la reducziun individuala da las premias pon ils chantuns impedir reducziuns individualas da las premias bler memia autas per retschavidras e retschaviders da prestaziuns supplementaras. 

Procedura simplifitgada per dumondas da natiralisaziun
L'ordinaziun tar la lescha dal dretg da burgais dal chantun Grischun vegn adattada per il 1. da zercladur 2014. La regenza ha concludì ina procedura simplifitgada per dumondas da natiralisaziun da persunas estras. Da nov vegni pretendì che petentas e petents esters ston agiuntar a lur dumonda da natiralisaziun sco sulet document da stadi civil la cumprova davart il stadi da famiglia u davart il stadi civil ch'è vegnì registrà en il register electronic da stadi civil (Infostar). Fin ussa stuevan vegnir inoltrads differents documents da stadi civil. 
 

Da vischnancas e da regiuns 

• Bregaglia: La revisiun totala da la planisaziun locala da l'anteriura vischnanca da Vicosoprano, concludida da la vischnanca da Bregaglia ils 9 da zercladur 2013, vegn approvada cun resalvas. Cun la nova planisaziun d'utilisaziun vegn tranter auter la zona da mastergn a Crot engrondida per circa 1 hectara. L'approvaziun ha lieu cun resalva da la concessiun d'ina permissiun da runcar, la quala premetta in basegn concret da domiciliaziun.
• Tavau: Il plan da zonas 1:1000 "Glaris", che la vischnanca da Tavau ha concludì ils 22 da settember 2013, vegn approvà. Uschia vegnan la parcella nr. 2600 sco er la gronda part da la parcella nr. 6353 attribuidas ad ina zona da mastergn da var 0,27 hectaras.
• Ftan: Las novas enzonaziuns che la vischnanca da Ftan ha concludì ils 20 da schaner 2013 en il rom da la revisiun totala da la planisaziun locala vegnan approvadas. I sa tracta en quest connex en emprima lingia da la determinaziun d'ina zona dal vitg "Quadras" en la dimensiun da var 0,35 hectaras.
• Grüsch: La revisiun parziala da la planisaziun locala, concludida da la vischnanca da Grüsch ils 22 da november 2013, vegn approvada. La revisiun parziala cuntegna mintgamai in'attribuziun ad ina zona d'edifizis d'abitar en il territori "Gärbi / Pra" a Grüsch (1,23 hectaras) ed en il territori "Pussanal / Zwy / Molinis" a Fanas (1,55 hectaras).
• Haldenstein: Il plan da zonas 1:1000 "Haldenstein" dals 29 d'avrigl 2011 vegn approvà cun cundiziuns areguard la zona d'abitar da circa 0,31 hectaras en il territori "Halda".
• Luzein: La revisiun parziala da la planisaziun locala, concludida da la vischnanca da Luzein ils 14 da mars 2014, vegn approvada. Cun la revisiun parziala vegn attribuida ina surfatscha da circa 1 hectara en il territori "Sandlöser" supplementarmain a la zona da mastergn existenta.
• S-chanf: La revisiun totala da la planisaziun locala, concludida da la vischnanca da S-chanf ils 23 e 24 da schaner 2013, vegn approvada cun excepziuns. Cun la revisiun totala vegn tranter auter stgaffida sin la parcella nr. 270 ina zona da mastergn da stgars 0,3 hectaras. Cunter las novas zonas per hotels sin las parcellas nr. 139, 803 ed 805 (Aurora Parc SA) sco er sin la parcella nr. 39 (Hotel Scaletta SA) èn vegnids inoltrads recurs da planisaziun. Perquai vegnan quellas sistidas. Betg vegnida approvada n'è tranter auter ina zona d'abitar da stgars 0,4 hectaras sin la parcella nr. 131.
• San Murezzan: La revisiun parziala da la planisaziun locala, concludida da la vischnanca da San Murezzan ils 24 da november 2013, vegn approvada. La revisiun parziala cumpiglia in engrondiment da la zona da sport per totalmain 0,45 hectaras. Tras quai vegnan stgaffidas las premissas per substituir il stabiliment da siglir tras ina construcziun nova en il lieu existent.
• Trun: La revisiun parziala da la planisaziun locala, concludida da la vischnanca da Trun ils 25 da november 2012, vegn approvada. La revisiun parziala cuntegna mesiras da planisaziun per augmentar la valur dal campadi tras in nov edifizi da gestiun e da recepziun, tras in parc sco er tras in parcadi public.
• Val Müstair: Las novas enzonaziuns che la vischnanca da Val Müstair ha concludì ils 7 d'avust 2013 en il rom da la revisiun totala da la planisaziun locala vegnan approvadas. I sa tracta en quest connex en emprima lingia d'ina zona per hotels da circa 0,14 hectaras en il territori "Palüds Dadaint" a Lü per construir ina chamona alpina "Alpin Lodge".
• Zernez: Las novas enzonaziuns che la vischnanca da Zernez ha concludì ils 12 da december 2013 en il rom d'ina revisiun parziala da la planisaziun locala vegnan approvadas. Quellas cumpiglian in engrondiment da la zona da construcziun en il territori "Ruzön" en la dimensiun da circa 1,53 hectaras, ina zona per hotels da 0,27 hectaras sin la parcella nr. 319 sco er l'engrondiment da la zona da mastergn per 1,6 hectaras en il territori "Cul". Plinavant vegn approvada la zona dal vitg ch'era vegnida sistida fin ussa sin las surfatschas parzialas da las parcellas nr. 101, 102 e 104 en il territori "Davo Röven".
• Zernez: La revisiun parziala da la planisaziun locala, concludida da la vischnanca da Zernez ils 20 d'avrigl 2011 e 24 da favrer 2014, vegn approvada. Tras quai vegn stgaffida la basa da planisaziun per surbajegiar la parcella nr. 138 che cumpiglia var 1448 m2 e ch'è situada en il nordost dal chastè "Planta-Wildenstein".
• Lumnezia: A la vischnanca da Lumnezia vegn garantida ina contribuziun chantunala da maximalmain 253 760 francs als custs per construir las vias champestras nr. 8, Sut Vitg, e nr. 10, Liginas, a Cumbel. Quai cun resalva d'ina contribuziun federala.
• Mundaun: A la vischnanca da Mundaun vegn concedida ina contribuziun chantunala da maximalmain 128 000 francs als custs per construir la via champestra nr. 1, Surcuolm-Bündner Rigi, 3. part. Quai cun resalva d'ina contribuziun federala.
• Vuorz: A la vischnanca da Vuorz vegn garantida ina contribuziun chantunala da maximalmain 198 990 francs als custs per construir la via champestra nr. 5, Gneida-Alp Dado, 1. part. Quai cun resalva d'ina contribuziun federala.
• Trin: Per restaurar la fortezza da Trin vegn concedida ina contribuziun en il rom da la tgira da monuments da maximalmain 23 700 francs.
• Val S. Pieder: Per restabilir il mir sitg Matt a Val S. Pieder, Ampervreila, vegn concedida ina contribuziun en il rom da la tgira da monuments da maximalmain 22 000 francs.
• Filisur: Per il project "Avertura dal guaud Greifenstein" da la vischnanca da Filisur vegn garantida ina contribuziun da maximalmain 622 710 francs. Per tgirar e cultivar ils guauds da protecziun en il territori "Buél – Greifenstein – Planchas" dovri ina meglra avertura.
• Glion: Per construir in'arcada per lung da la via Sontga Clau Sura a Glion vegn concedida ina contribuziun chantunala da maximalmain 245 000 francs.
• Trimmis: A la vischnanca da Trimmis vegn garantida ina contribuziun da 77 625 francs per sanar il reservuar dad Obersays. Da quest import sto la vischnanca da Trimmis surpigliar ina part da 6 pertschient. La garanzia da la contribuziun chantunala premetta ina subvenziun correspundenta da la confederaziun.

Contribuziuns chantunalas a differentas instituziuns 

• C-films SA, realisaziun d'in film d'Ursin: A la C-films SA vegn garantida ina contribuziun chantunala da 450 000 francs per realisar il film "Ursin". Quai sut la premissa che l'uffizi federal da cultura (promoziun dal film) e la televisiun svizra (SRF) sa participeschian als custs. La producziun dal film duai cumenzar l'atun 2014 e durar var 1 onn. L'organisaziun da marketing Grischun vacanzas e la Turissem Engiadina Scuol Samignun Val Müstair SA survegnan la pussaivladad da profitar activamain da la valur turistica dal film.
• Viafier retica SA: A la Viafier retica SA vegn concedida ina contribuziun da totalmain 90 000 francs per las occurrenzas da giubileum da l'onn 2014 e per la publicaziun planisada "125 onns en viadi fascinant".
• Chombra da commerzi svizra en l'Italia (Milaun): Per l'exposiziun "Giovanni Segantini. Das Tryptichon, ein Projekt für die Weltausstellung 1899" (titel da lavur), che vegn mussada dals 18 da settember 2014 fin ils 18 da schaner 2015 a Milaun, vegn garantida a la chombra da commerzi svizra en l'Italia (Milaun) ina contribuziun da maximalmain 20 000 francs.

Projects da vias
Ultra da quai ha la regenza approvà 3,966 milliuns francs per lavurs da construcziun sin ils suandants trajects:
- via dal Güglia: lavurs d'impressari e da cuvrida, correcziun da la via, Stettli – Parpan
- via sursilvana: installaziuns electricas da la punt nova sur il Rain, Glion vest 
 

Gremi: regenza
Funtauna: rg chanzlia chantunala dal Grischun