La regenza grischuna ha nominà las represchentanzas dal chantun sco er las collavuraturas ed ils collavuraturs en uffizi accessoric dal chantun. Passa la mesadad dals sezs vacants da las cumissiuns ha pudì vegnir occupada cun dunnas. Plinavant ha la regenza approvà il project da construcziun per ina nova ovra idraulica Ragn d'Err. 

Elegì las represchentanzas dal chantun sco er las collavuraturas ed ils collavuraturs en uffizi accessoric
La regenza ha nominà las represchentanzas dal chantun sco er las collavuraturas ed ils collavuraturs en uffizi accessoric dal chantun per la perioda dal 1. da fanadur 2014 fin ils 30 da zercladur 2018. Las represchentanzas dal chantun èn persunas che vegnan delegadas dal chantun respectivamain che fan uffizialmain part dals organs directivs strategics da participaziuns, d'uniuns e da fundaziuns u da societads da la facultad finanziala dal chantun. Las collavuraturas ed ils collavuraturs en uffizi accessoric dal chantun èn persunas che adempleschan incumbensas administrativas, ma ch'èn activas ordaifer l'organisaziun administrativa pli stretga. Las cumissiuns ed ils gremis, dals quals las collavuraturas ed ils collavuraturs en uffizi accessoric fan part, èn attribuids administrativamain ad in dals tschintg departaments u a la chanzlia chantunala. Tut en tut ha la regenza nominà 29 cumissiuns e gremis. Dals totalmain 31 posts ch'eran daventads vacants èn 16 vegnids occupads cun dunnas e 15 cun umens. La cumissiun per meds d'instrucziun e la cumissiun per la gimnastica da scola èn vegnidas abolidas. 
Link a la survista da las represchentanzas dal chantun sco er da las collavuraturas e dals collavuraturs en uffizi accessoric 

Approvà la nova ovra idraulica Ragn d'Err
La regenza ha approvà il project da las Ovras electricas Ragn d'Err SA per construir ina nova ovra idraulica en la Val d'Err sin il territori da la vischnanca da Tinizong-Rona. Il project prevesa dus stgalims d'ovra electrica Mulegn e Colm. En ils novs implants electrics vegnan producidas tut en tut 19,31 uras da gigawatt electricitad. Quai correspunda pli u main a l'electricitad che circa 4300 chasadas consumeschan en media per onn. I vegn fatg quint cun custs d'investiziun da circa 28 milliuns francs. Las cundiziuns ch'èn colliadas cun l'approvaziun dal project prevesan tranter auter mesiras da cumpensaziun en la zona umida Tors. Cun in project da construcziun che duai augmentar la valur da la zona umida Tors pon ins uschia ademplir la cumpensaziun ecologica per il project d'ovra electrica. La concessiun dal dretg da las auas che la vischnanca da Tinizong-Rona aveva dà a las Ovras electricas Ragn d'Err SA ha la regenza approvà gia l'october 2012. A las Ovras electricas Ragn d'Err SA èn participadas las Ovras electricas bernaisas (BKW) e la vischnanca da Tinizong-Rona. 
 

Projects da vias
Ultra da quai ha la regenza approvà 4,595 milliuns francs per lavurs da construcziun sin ils suandants trajects:
- via dal Bernina: lavurs da cuvrida, Süsom Arlas – Ospizi dal Bernina, kilometer 16,35 – 17,60
- via d'Engiadina: lavurs da cuvrida, Samedan – Bever, kilometer 12,30 – 13,50
- via sursilvana: lavurs d'impressari, access a la via da la Lumnezia, Via Crappa Grossa, part 1
- via da Surcuolm: lavurs da cuvrida, via da Sursaissa – entrada da Surcuolm 


Gremi: regenza
Funtauna: rg chanzlia chantunala dal Grischun