La regenza grischuna beneventa ina participaziun da la Svizra a l'uffizi europeic da sustegn en dumondas d'asil cun l'intent da chattar ina meglra collavuraziun internaziunala.
Sustegnì la cunvegna EASO da la confederaziun
La regenza grischuna beneventa la participaziun da la Svizra a l'uffizi europeic da sustegn en dumondas d'asil (European Asylum Support Office, EASO). Ella sustegna ina cunvegna respectiva da la confederaziun cun la UE. Uschia vegni pussibilità als quatter stadis associads da las cunvegnas da Schengen e da Dublin (Svizra, Norvegia, Islanda, Liechtenstein) da sa participar a las activitads dal EASO. Il EASO facilitescha, coordinescha e promova la collavuraziun internaziunala en dumondas d'asil. Ultra da quai sustegna el ils stadis commembers da la UE, dals quals il sistem d'asil è engrevgià spezialmain. Il biro n'ha naginas cumpetenzas d'influenzar las decisiuns da las autoritads naziunalas d'asil. Sco che la regenza grischuna scriva en sia posiziun a la confederaziun po, cun la participaziun al EASO, vegnir cuntanschida in'assimilaziun da las praticas individualas da mintga stadi en il territori da Dublin.
Dus projects da votaziun federals e la refurma chantunala da la gulivaziun da finanzas per la votaziun dals 28 da settember 2014
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia dals 28 da settember 2014:
- iniziativa dal pievel "Basta cun la TPV discriminanta per la gastronomia!";
- iniziativa dal pievel "Per ina cassa da malsauns publica".
Sco gia communitgà pli baud vegn suttamess a la votaziun dal pievel la dumengia dals 28 da settember 2014 sco fatschenta chantunala la lescha davart la refurma da la gulivaziun da finanzas en il chantun Grischun (lescha generala davart la refurma da la GF).
Contribuziuns chantunalas a differentas instituziuns
- Fundaziun "Gott hilft": A la sanaziun da la chasa da gruppas "Schwalben" da la scola-dimora da la fundaziun "Gott hilft" a Zizers vegn garantida ina contribuziun da construcziun da maximalmain 115 000 francs. La chasa da gruppas "Schwalben" vegn duvrada sco chasa d'abitar per la chasa per instrucziun speziala.
Gremi: regenza
Funtauna: rg chanzlia chantunala dal Grischun