La concurrenza da projects per ils teams da planisaders generals che ha gì lieu en ina procedura selectiva a dus stgalims e che serva a la nova construcziun dal center administrativ "sinergia" è decidida. Dad otg propostas ha la giuria mess sin l'emprim rang il project dal team dals planisaders generals/architects Implenia Svizra SA / D. Jüngling + A. Hagmann da Cuira. La regenza grischuna ha surdà l'ulteriura projectaziun.

En in'emprima etappa vegnan reunidas 400 plazzas da lavur en in nov edifizi a Cuira vest. Il chantun po uschia reducir ils custs currents, trair a niz meglier las sinergias ed optimar ils andaments. L'avertura dal center administrativ "sinergia" è previsa per l'onn 2018. Il credit d'impegn necessari da 69 milliuns francs è vegnì approvà da las votantas e dals votants grischuns il mars 2012.

Il chantun Grischun ha envidà otg teams da planisaders generals ch'èn vegnids tschernids da la giuria ad inoltrar fin la fin d'avrigl 2014 in project da concurrenza per la nova construcziun dal center administrativ "sinergia" a Cuira. Ils teams da planisaders generals èn vegnids tschernids or da 40 candidaturas. Sco victur da la concurrenza ha nominà la giuria il team da planisaders generals / biro d'architectura Implenia Svizra SA / D. Jüngling + A. Hagmann da Cuira cun lur project "DREI BÜNDE". Sin la segunda plazza suonda il project "FENSTERPLATZ MIT AUSSICHT" dal team da planisaders generals Bearth & Deplazes / Walter Dietsche da Cuira. La terza plazza ha cuntanschì il project "PARC" dad AEBI & VINCENT da Berna.
 
Il team da planisaders ch'è vegnì resguardà ha gia construì differents edifizis per l'administraziun chantunala. Tenor l'avis da la giuria fascinescha il project victur tras ina buna integraziun en l'architectura urbana, tras in'expressiun architectonica che correspunda al lieu ed a l'incumbensa e tras in concept d'etappas che persvada. L'organisaziun dal plan permetta ina flexibilitad spaziala. La realisaziun da l'edifizi en il standard Minergie-P-Eco® permetta da construir en moda effizienta areguard l'energia ed areguard il schanetg da las resursas.

La strategia chantunala d'immobiglias dat paisa a centers regiunals ferms
L'installaziun d'in center d'administraziun a Cuira fa part da la strategia chantunala d'immobiglias. Quella prevesa da furmar totalmain nov centers regiunals ferms e d'als reparter sin l'entir chantun. Cun la concentraziun, cun ils standards moderns da las localitads sco er cun las ulteriuras mesiras pon vegnir realisads en moda durabla reducziuns da las surfatschas relevantas per ils custs ed in meglier niz per la clientella. A Glion, a Roveredo, a Tusaun ed a Tavau ha il chantun gia fusiunà cun success l'administraziun. A Scuol è previsa l'avertura il november 2014 ed a Landquart l'atun 2015. Er a Samedan ed a Puschlav duain vegnir installads entaifer ils proxims onns centers administrativs.

Realisaziun dal project en etappas
Il concept "sinergia" planisà per il lieu d'administraziun Cuira prevesa da spustar tut en tut 670 plazzas da lavur a Cuira vest e duai vegnir realisà successivamain en duas etappas separadas. En l'emprima etappa da realisaziun duain ils posts da servetsch, nua ch'il basegn d'agir è il pli grond, vegnir spustads en in nov center administrativ cun var 400 plazzas da lavur a la Ringstrasse/Salvatorenstrasse. En ina segunda etappa, che sto puspè vegnir suttamessa al parlament ed al pievel avant la realisaziun, duain vegnir installadas ulteriuras 270 plazzas da lavur. Il project "sinergia" na prevesa ni d'augmentar il dumber total da las collavuraturas e dals collavuraturs dal persunal chantunal ni da reducir las plazzas da lavur dals ulteriurs centers regiunals en la chapitala chantunala.

Da la planisaziun al cumenzament da las lavurs da construcziun
Il project victur vegn ussa planisà vinavant. Per pudair cumenzar cun las lavurs da construcziun è necessaria ina procedura dal plan da quartier, che vegn iniziada la stad/l'atun 2014. L'uffizi da construcziun auta dal Grischun ha previs da cumenzar cun las lavurs da construcziun il principi da l'onn 2016. 

Exposiziun publica
Tut las otg contribuziuns da concurrenza pon vegnir visitadas en il rom d'ina exposiziun publica fin ils 25 da fanadur 2014 ils lavurdis da las 7.00 fin las 17.30 en il foyer al plaunterren da la SATE a Cuira, Pulvermühlestrasse 57. I stattan a disposiziun plazzas da parcar visavi la SATE. Il viadi cun il bus parta davent da la staziun, lingia 2, en direcziun "Obere Au", fin a la fermada "HTW Grischunaweg". Il rapport da la giuria po ultra da quai vegnir consultà e chargià giu da la pagina d'internet da l'uffizi da construcziun auta dal Grischun sin www.hochbauamt.gr.ch. 
 

Agiuntas:
- Rapport da la giuria per la nova construcziun dal center administrativ "sinergia" a Cuira
- Visualisaziuns dal project victur "DREI BÜNDE":

 

Infurmaziuns:
- president da la regenza dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail Mario.Cavigelli@bvfd.gr.ch  
- Markus Dünner, architect chantunal, uffizi da construcziun auta, tel. 081 257 36 31, e-mail Markus.Duenner@hba.gr.ch  
 

Gremi: regenza
Funtauna: rg departament da construcziun, traffic e selvicultura