La regenza è fitg cuntenta ch'il project da votaziun davart la refurma da la gulivaziun da finanzas grischuna (refurma da la GF) ha chattà ina maioritad dal pievel. Suenter in cumbat da votaziun ordvart engaschà han las votantas ed ils votants dà glisch verda a la regenza per realisar quest project fitg impurtant per il Grischun. La regenza prevesa d'introducir la refurma da la GF per il 1. da schaner 2016. Ella vegn ad infurmar las vischnancas davart las mesiras da realisaziun e la tarda stad 2015 davart ils pajaments da gulivaziun ch'èn decisivs per l'onn 2016.

Las resalvas e las objecziuns dal comité da referendum sco er da las adversarias e dals adversaris da quest project ha la regenza adina prendì serius. Ella ha empruvà da refutar questas objecziuns en ina discussiun objectiva. Per quest intent ha ella survegnì grond sustegn dal comité aderent, da numerusas represchentantas e da numerus represchentants communals e d'ulteriuras persunalitads engaschadas. Per tut quai engrazia la regenza cordialmain. Evidentamain ha quest engaschament gidà a render pli chapaivel quest project ch'è senza dubi fitg cumplex, uschia ch'el ha chattà ina maioritad.

La refurma da la GF rinforza las vischnancas grischunas. Da quai profita er il chantun. La refurma da la GF procura per ina solidaritad moderada tranter las vischnancas e per in sustegn cun cleras finamiras da las vischnancas finanzialmain deblas sco er da quellas vischnancas che ston purtar grevezzas sproporziunadas da muntogna, d'abitadi e da scola. Nagina vischnanca na sto temair la nova gulivaziun da finanzas. L'acceptaziun da la refurma da la GF è er in pass impurtant per la refurma currenta da vischnancas e dal territori. La concepziun dal futur dal Grischun cuntinuescha. La regenza sa legra da questa sfida e la prenda en maun cun elan.


Infurmaziuns:
Cussegliera guvernativa Barbara Janom Steiner, scheffa dal departament da finanzas e vischnancas dal Grischun, e-mail barbara.janom@dfg.gr.ch  
Contacts per telefon per las medias la dumengia da votaziun:
servetsch da medias, chanzlia chantunala dal Grischun, tel. 081 257 22 47 


Gremi: regenza
Funtauna: rg chanzlia chantunala dal Grischun