Ils 22 da settember 2013 han las votantas ed ils votants dal Grischun acceptà l'iniziativa chantunala dal pievel "Gea ad electricitad netta senza forza electrica da charvun". L'iniziativa era stada formulada sco proposta generala. La regenza suttametta ussa al cussegl grond la missiva tar in sboz elavurà per in artitgel constituziunal.

L'iniziativa aveva pretendì d'integrar en la constituziun chantunala in cler confess cunter ovras electricas a charvun ed in scumond per interpresas, a las qualas il chantun è participà, da far investiziuns en ovras electricas a charvun. Cun quai sa drizza ella en general cunter la forza dal charvun sco purtader d'energia e pretenda per l'avegnir in cumportament correspundent da tut las interpresas cun ina participaziun dal chantun. En il cas concret ha l'iniziativa cumbattì cunter il project da la Repower a Saline Joniche, l'unic project per in'ovra electrica a charvun d'ina interpresa cun participaziun dal chantun. 

Las pretensiuns èn per part gia realisadas
La "iniziativa da charvun" ch'è vegnida acceptada ils 22 da settember 2013 ha mussà tscherts effects gia avant sia realisaziun. Uschia ha la regenza resguardà il giavisch dal pievel gia tar l'elavuraziun da sia strategia da proprietari per la Repower e pretendì da l'interpresa d'energia grischuna da sa retrair en moda ordinada e lianta dal project per in'ovra electrica a charvun a Saline Joniche. Il medem mument ha ella pretendì che l'interpresa na sa participeschia betg pli a societads d'ovras electricas a charvun. Sin quai ha la Repower decidì e communitgà uffizialmain ch'ella sa retiria – resguardond las obligaziuns contractualas surpigliadas – dal project "Saline Joniche" fin il pli tard la fin da l'onn 2015 e ch'ella desistia en l'avegnir da far investiziuns en ovras electricas a charvun.

Uschia na datti il pli tard a partir da la fin da l'onn 2015 nagina interpresa, da la quala il chantun posseda aczias, ch'è participada a societads d'ovras electricas a charvun. Tar la realisaziun da la "iniziativa da charvun" vali pia da drizzar il focus sin l'agir futur dal chantun tar cumpras da participaziuns sco er sin l'orientaziun futura d'interpresas, a las qualas il chantun è participà. La nova disposiziun constituziunala proponida prevesa perquai d'ina vart ch'il chantun na sa participeschia betg vi d'interpresas che fan investiziuns en ovras electricas a charvun. Da l'autra vart vegn il chantun obligà da procurar en il rom da sias pussaivladads legalas e politicas che interpresas, a las qualas el è participà, desistian da far talas investiziuns. La nova disposiziun constituziunala è tenor la persvasiun da la regenza in cler confess cunter la producziun d'electricitad ord charvun. 

Necessaria è in'ulteriura votaziun dal pievel
Il cussegl grond vegn a tractar la realisaziun concreta da la "iniziativa da charvun" durant la sessiun da december 2014. Perquai che quella pretenda ina midada da la constituziun chantunala, sto ella alura vegnir suttamessa ad in'ulteriura votaziun dal pievel ch'è previsa per ils 8 da mars 2015. 
 

Infurmaziuns:
dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail Mario.Cavigelli@bvfd.gr.ch  


Gremi: regenza
Funtauna: rg chanzlia chantunala dal Grischun