La regenza grischuna ha approvà l'engrondiment da l'ovra electrica Susasca a Susch. Plinavant ha la regenza approvà la versiun repassada da la directiva per quietar il traffic entaifer il vitg. 

Ovra electrica Susasca: Approvà la concessiun ed il project d'engrondiment
L'ovra electrica Susasca a Susch po vegnir engrondida. La regenza ha approvà cun cundiziuns in supplement tar la concessiun dal dretg da las auas dals 12 da zercladur 2008 a l'Ovra electrica Susasca Susch SA (OESS), concedì da la vischnanca da Susch ils 30 d'avrigl 2013, ed ella ha acceptà il project d'engrondiment. La OESS maina dapi il november 2010 l'ovra electrica Susasca. Tar la construcziun èn tut ils implants vegnids dimensiunads uschia, ch'igl è pussaivel d'engrondir l'ovra electrica en ina segunda etappa senza midadas architectonicas pli grondas. Tras l'engrondiment vegn augmentada la prestaziun installada da stgars 3 a 5,6 megawatts (MW), e la producziun vegn auzada da 18 a 25 uras da gigawatt (GWh) per onn. 25 uras da gigawatt electricitad correspundan al basegn annual da circa 5500 chasadas. La OESS fa quint cun custs d'investiziun da totalmain 3,6 milliuns francs ch'èn previs per mesiras architectonicas che optimeschan la tschiffada d'aua existenta, per l'installaziun d'ina segunda gruppa da maschinas en la centrala sco er per l'engrondiment parzial da la colliaziun actuala cun la rait. 

Repassà la directiva per quietar il traffic entaifer il vitg
La directiva chantunala per quietar il traffic entaifer il vitg serva dapi ils 15 da mars 2005 a las autoritads communalas, a las planisadras ed als planisaders, als uffizis ed a las autoritads da permissiun sco agid per giuditgar dumondas concernent zonas da tempo 30, zonas d'inscunter u zonas da pedunas e peduns. En consequenza d'ina decisiun da la dretgira administrativa dals 9 da settember 2011 resp. dal tribunal federal dals 10 da december 2012 concernent l'introducziun d'ina zona da tempo 30 en la vischnanca da Sumvitg ha la directiva stuì vegnir revedida. Las instanzas giudizialas avevan tranter auter declerà ch'ina valur da traffic, che vegniva duvrada fin lura sco criteri central per fixar zonas da tempo 30, saja nunadattada per quest intent.
La regenza ha approvà la nova directiva. Dapli paisa survegnan ussa l'andament da la procedura da dumonda sco er l'expertisa, ch'è la basa per decider davart eventualas mesiras per quietar il traffic. Uschia èn regladas detagliadamain las pretensiuns envers il cuntegn da l'expertisa, envers la tscherna da l'experta u da l'expert sco er envers l'elavuraziun da l'incumbensa d'expertisa, e la procedura da dumonda è structurada en moda pli clera. Novs èn er ils criteris da differenziaziun areguard las categorias da vias. Differenzià vegn mo pli tranter vias orientadas al traffic e vias orientadas a l'abitadi. Er areguard ina renovaziun posteriura da la via entaifer il vitg u areguard ina midada dal tagl traversal da la via cuntegna la directiva ussa prescripziuns precisas. 

Nov emprest per l'agid a manaschis agriculs
Sco gia l'onn precedent vegn l'emprest dal chantun Grischun a l'associaziun grischuna per credits a l'agricultura (ACA) auzà per 400 000 francs er per l'onn 2014. Vitiers vegnan tuttina blers meds finanzials federals. La ACA po conceder a las puras ed als purs agids da manaschi en furma d'emprests senza tschains per metter en urden difficultads finanzialas resultadas senza atgna culpa, per substituir emprests tschainsids existents (conversiun da debits) u per facilitar la liquidaziun dal manaschi. L'onn passà èn vegnids pajads emprests da totalmain 306 000 francs. 

Il concordat davart il commerzi da muvel na correspunda betg al temp dad oz
La regenza è d'accord ch'il concordat davart il commerzi da muvel vegn abolì. Cun il concordat da l'onn 1943 han ils chantuns fixà regulaziuns unitaras per il commerzi da muvel. Oz è l'impurtanza dal concordat sa relativada fermamain. L'obligaziun d'avair ina patenta per il commerzi da muvel, ch'è fixada en il concordat, ma er las premissas per conceder las patentas èn regladas sin plaun federal. Plinavant vegnan las taxas da svieuta, ch'eran regladas fin ussa en il concordat, remplazzadas indirectamain tras ina taxa da maz tenor la lescha davart epidemias d'animals. Ils retgavs da la taxa da maz vegnan impundids da la confederaziun per la prevenziun cunter epidemias d'animals, numnadamain per programs naziunals per survegliar epidemias d'animals. Uschia vegnan ils chantuns distgargiads da la finanziaziun da quests programs, e quai en la dimensiun da circa 3 milliuns francs. 
 

Da vischnancas e da regiuns 

• Lumnezia: La revisiun parziala da la planisaziun locala, concludida da la vischnanca da Lumnezia ils 13 da zercladur 2014, vegn approvada. Uschia vegnan stgaffidas las premissas da la planisaziun d'utilisaziun per in nov local da pumpiers sco er per ina nova fermada per l'auto da posta ad Uors.
• Giuvaulta: La revisiun parziala da la lescha da construcziun, concludida da la vischnanca da Giuvaulta ils 19 da zercladur 2014, vegn approvada.
• St. Antönien: A la vischnanca da St. Antönien vegn concedida ina contribuziun dad 81 376 francs als custs supplementars ed als custs d'extensiun per il provediment d'aua. La garanzia da la contribuziun chantunala premetta ina subvenziun correspundenta da la confederaziun.

 
Contribuziuns chantunalas a differentas instituziuns 

• Fundaziun Scalottas: A la fundaziun Scalottas a Scharàns vegn garantida ina contribuziun da 957 360 francs per transfurmar ed engrondir la nova gruppa d'abitar externa chasa Tannò. La garanzia vegn dada cun la resalva che la finanziaziun restanta saja segirada. Il favrer passà aveva la regenza sustegnì l'engrondiment dal center da cumpetenza per umans cun impediments da la fundaziun Scalottas e concedì ina contribuziun chantunala da 764 000 francs per cumprar l'immobiglia vischina.
  Plinavant vegn garantida a la fundaziun Scalottas ina contribuziun da construcziun da 96 000 francs per sanar il stgaudament dal manaschi existent. 

Gremi: regenza
Funtauna: rg chanzlia chantunala dal Grischun