La regenza grischuna ha deliberà ina contribuziun chantunala da 2 milliuns francs per il project dal campus autalpin Tavau Wolfgang. Ultra da quai ha la regenza approvà pliras leschas communalas da turissem ed ha tractà ulteriuras fatschentas da vischnancas e da regiuns. 

Il chantun sa participescha a l'installaziun dal campus autalpin Tavau Wolfgang
Il chantun sustegna il project dal campus autalpin Tavau Wolfgang cun ina contribuziun da 2 milliuns francs. La regenza ha garantì a la firma Kühne Real Estate SA ina contribuziun chantunala da questa autezza. Il campus autalpin per asma ed allergologia vegn installà sin l'areal da la clinica autalpina da Tavau. Dal campus fan part l'institut per la perscrutaziun d'allergias e da scolaziun Kühne Center for Allergy-Research and Education (CK-CARE SA) ch'è activ dapi 5 onns a Tavau sco er l'Institut svizzer da retschertgas davart allergias ed asma (ISRA) renumà. Las activitads dal campus cumpiglian il provediment clinic, la perscrutaziun d'emprima qualitad en il sectur d'allergias e da l'asma, scolaziun e furmaziun, organisaziun d'occurrenzas scientificas e d'occurrenzas orientadas a la pratica (congress, dietas e lavuratoris) sco er il transferiment da la perscrutaziun e da las applicaziuns. La purschida vegn realisada cun ina collavuraziun intensiva da la clinica cun ils dus instituts e cun il sustegn d'ulteriurs partenaris. La finamira è in center da cumpetenza internaziunal da la perscrutaziun d'allergias e da l'asma a Tavau sco lieu cun ina lunga tradiziun en chaussa.
Per la cumpra da l'areal dal campus vegnan investids 35 milliuns francs. Supplementarmain vegnan duvrads 9,708 milliuns francs per in edifizi nov e per renovar ils edifizis existents. Tar las 170 plazzas da lavur da la clinica autalpina e tar las circa 50 plazzas da lavur dal ISRA duain vegnir vitiers ils proxims onns grazia al campus ulteriuras 50 plazzas. 

Barat gratuit da geodatas da basa tranter la confederaziun ed il chantun
La regenza grischuna approvescha in barat gratuit da geodatas da basa tranter las autoritads e sustegna in sboz da contract correspundent da la coordinaziun interchantunala da las geoinfurmaziuns (CIGEO). Oz vegnan las geodatas da basa messas a disposiziun en ils chantuns e tar la confederaziun tenor las ordinaziuns da taxas respectivas. La cunvegna en discussiun postulescha da renunziar a metter a quint vicendaivlamain il barat da datas u d'incassar ina pauschala per quai tranter las autoritads. In barat gratuit promova l'utilisaziun da geodatas da basa actualas, evitescha custs administrativs ed è en tut d'avantatg per il chantun Grischun, perquai che quel n'incassescha gia dapi l'onn 2012 pli naginas taxas per prender invista e per retrair geodatas da basa ch'èn accessiblas publicamain. 

Las baselgias chantunalas vegnan indemnisadas per la cussegliaziun da lètg e da famiglias
La regenza ha approvà las novas cunvegnas da prestaziun davart la cussegliaziun da lètg e da famiglias cun la baselgia evangelica refurmada sco er cun la baselgia catolica dal chantun Grischun. Dapi questa stad datti a la Reichsgasse 25 a Cuira il post cuminaivel da cussegliaziun da lètg e da famiglias "Paarlando, cussegliaziun da pèrs e da vita Grischun" che stat sut la responsabladad da las duas baselgias chantunalas. Las baselgias chantunalas vegnan indemnisadas per questa purschida cun ina contribuziun pauschala annuala da mintgamai 120 000 francs. Ils novs contracts da prestaziuns valan fin la fin da l'onn 2018. Dapi l'onn 1989 paja la regenza contribuziuns als posts da cussegliaziun da lètg da las baselgias chantunalas sco cumplettaziun da la purschida da cussegliaziun ch'ils servetschs socials, psicologas e psicologs independents u terzas persunas porschan. 
 

Da vischnancas e da regiuns 

• Andiast, Breil, Mustér, Glion, Lumnezia, Mundaun, Sursaissa, Vuorz: Las leschas davart las taxas da giasts e las taxas da turissem da las vischnancas d'Andiast dals 13 da zercladur 2014, da Breil dals 25 d'avrigl 2014, da Mustér dals 19 da settember 2014, da Glion dals 14 da matg 2014, da Lumnezia dals 28 da settember 2014, da Mundaun dals 13 da zercladur 2014, da Sursaissa dals 13 da zercladur 2014 sco er da Vuorz dals 18 da zercladur 2014 vegnan approvadas. Las leschas communalas davart il turissem pon vegnir interpretadas en accordanza cun il dretg surordinà.
• Arosa: Il project da la vischnanca dad Arosa per construir in batschigl d'aua da plievgia nov vegn approvà. En in'emprima transcha vegn deliberada ina contribuziun chantunala da maximalmain 319 550 francs.
• Calanca: La lescha da taglia da la nova vischnanca da Calanca (vischnancas vertentas Arvigo, Braggio, Cauco e Selma) dals 19 d'october 2014 vegn approvada.
• Val Stussavgia: La lescha da taglia dal cumin-baselgia evangelic-refurmà da Val Stussavgia dals 2 d'avrigl 2014 vegn approvada cun resalvas.
• Tumein: La revisiun parziala da la planisaziun locala ch'è vegnida concludida da la vischnanca da Tumein ils 20 da matg 2014 e che cumpiglia in plan da zonas 1:1000 "Zona d'abitar Ried (parcella nr. 331)" vegn approvada.
• Valsot: La lescha davart las taxas da cura e davart las taxas per promover il turissem da la vischnanca da Valsot dals 2 da december 2013 resp. dals 25 da zercladur 2014 vegn approvada.

Contribuziuns chantunalas a differentas instituziuns 

• Institut per turissem e temp liber (ITT): A l'institut per turissem e temp liber (ITT) da la SATE a Cuira vegn garantida ina contribuziun chantunala da totalmain 400 000 francs (100 000 francs per onn) sin basa da la cunvegna da prestaziun 2015 – 2018. Il ITT stgaffescha la basa per sviluppar strategias e concepts da realisaziun en l'economia da turissem ed el promova il barat d'infurmaziuns en la branscha. Uschia vegnan realisads per exempel enquistas dals giasts e mintga onn in forum da trend.

Projects da vias
- Masanserstrasse, Cuira: Per construir in vial per il bus sin la Masanserstrasse a Cuira e per promover il traffic public da persunas da la cruschada da la Giacomettistrasse al Weisstorkel vegn garantida ina contribuziun chantunala da maximalmain 394 000 francs. Cun il traject nov vegnan la segirezza ed il moviment dal traffic meglierads cleramain sin questa axa urbana da traffic impurtanta. La regenza aveva gia sustegnì las autras etappas da construcziun da quest project.

Ultra da quai ha la regenza approvà 4,961 milliuns francs per lavurs da construcziun sin ils suandants trajects:
- via sursilvana: lavurs d'impressari, colliaziun cun la via da Breil
- via da Tràn: lavurs d'impressari, spartavias via da Veulden – Vecs 
 

Gremi: regenza
Funtauna: rg chanzlia chantunala dal Grischun