En il chantun Grischun è la quota da dischoccupaziun s'augmentada il november per 0,2 puncts procentuals sin 2,0 pertschient. L'augment ha da far cun la stagiun e pervegn dals secturs da construcziun e da l'hotellaria. "Dischoccupà – ed ussa?" In nov video da la chanzlia chantunala dal Grischun mussa sin www.gr.ch tge pass ch'èn necessaris suenter ina desditga.

Il november ha il chantun Grischun registrà 2158 persunas dischoccupadas. Quai correspunda ad ina quota da dischoccupaziun da 2,0 pertschient. Envers il mais precedent cun 1992 persunas dischoccupadas è il dumber da persunas dischoccupadas creschì per 166. Ultra da quai èn vegnidas registradas 1559 persunas che tschertgan ina plazza che n'èn betg dischoccupadas. Tar las persunas che tschertgan ina plazza che n'èn betg dischoccupadas appartegnan las persunas che sa participeschan a mesiras da furmaziun supplementara e d'occupaziun u che obtegnan in gudogn intermediar sco er las persunas che fan mo diever dals servetschs d'intermediaziun dals centers regiunals d'intermediaziun da lavur (CIL). Sch'ins adescha il dumber da las persunas dischoccupadas cun quel da las persunas che tschertgan ina plazza che n'èn betg dischoccupadas, resulta il dumber da las persunas che tschertgan ina plazza. Il november èn vegnidas registradas 3717 persunas che tschertgan ina plazza. Envers il mais precedent è quest dumber creschì per 227. L'augment da la dischoccupaziun il november ha da far cun la stagiun e po vegnir attribuì al regress en l'activitad da construcziun.

Da las 2158 persunas dischoccupadas eran 956 dunnas e 1202 umens. Il dumber il pli aut da persunas dischoccupadas han registrà l'hotellaria (874), l'industria da construcziun (300) sco er il commerzi en detagl (113). Il november èn vegnidas registradas 78 persunas dischoccupadas da lunga durada. Envers il mais precedent cun 68 persunas dischoccupadas da lunga durada è quest dumber creschì.

En tut la Svizra è il dumber da las persunas dischoccupadas s'augmentà da 132 397 sin 136 552 persunas. La quota da dischoccupaziun importa en Svizra 3,2 pertschient. Ultra da quai èn vegnidas registradas en tut la Svizra bundant 57 000 persunas che tschertgan ina plazza che n'èn betg dischoccupadas.

Lavur reducida en il Grischun
Il november han trais manaschis cun 68 forzas da lavur pertutgadas gì d'introducir lavur reducida. Envers il mais precedent è quest dumber restà il medem. Tar las cifras inditgadas sa tracti da valurs tenor la preannunzia. In dumber exact da las persunas ch'èn pertutgadas effectivamain da la lavur reducida na po betg vegnir inditgà, perquai che las interpresas fan giu quint davart l'indemnisaziun per lavur reducida en moda retardada cun las differentas cassas da dischoccupaziun.

Remartga:
Il video davart quest tema stat a disposiziun sut www.gr.ch.


Infurmaziuns:
- Paul Schwendener, manader da l'uffizi per industria, mastergn e lavur, tel. 081 257 23 45, e-mail: paul.schwendener@kiga.gr.ch  


Gremi: uffizi per industria, mastergn e lavur dal Grischun
Funtauna: rg uffizi per industria, mastergn e lavur