En sia ultima sesida ha la regenza grischuna deliberà il concept dal territori per il Grischun. Plinavant ha la regenza approvà adattaziuns en l'ordinaziun da finanzas dal chantun Grischun ed en l'ordinaziun da finanzas per las vischnancas.   

Deliberà il concept dal territori per il Grischun
La regenza ha prendì enconuschientscha en moda positiva dal concept dal territori per il Grischun dals 10 da december 2014. Il concept dal territori per il Grischun sa basa sin las structuras e sin las atgnadads dal chantun. El resguarda ils trends da l'economia, da la societad e da l'ambient ed examinescha lur consequenzas per noss chantun. Il cuntegn principal dal concept dal territori furman las finamiras e las strategias areguard l'utilisaziun dal spazi, areguard la structura dals centers e la structura da provediment sco er areguard il posiziunament en il spazi surordinà. Per ch'il concept dal territori haja in vast fundament, è vegnida furmada in'organisaziun da project cun var 140 persunas. Questa organisaziun sa cumponiva da participantas e participants da forums en las regiuns sco er d'in comité spezial cun represchentantas e represchentants d'uffizis e d'organisaziuns. Il concept dal territori per il Grischun serva sco basa e sco directiva per elavurar proximamain il plan directiv chantunal en il sectur da l'abitadi sco er per repassar en general il plan directiv chantunal.
Link concept dal territori per il Grischun

Adattà l'ordinaziun da finanzas dal chantun Grischun e l'ordinaziun da finanzas per las vischnancas
La regenza ha approvà la revisiun parziala da l'ordinaziun da finanzas dal chantun Grischun. Suenter las emprimas experientschas cun il nov model da contabilitad e cun la nova legislaziun èsi sa mussà che differents secturs da l'ordinaziun da finanzas stuessan vegnir revedids en tscherts puncts. I sa tracta cunzunt da sclerir las cumpetenzas, da simplifitgar ils andaments sco er da precisar las disposiziuns ch'èn relevantas per realisar il nov standard da rendaquint (MAC2).
Plinavant è vegnida approvada la revisiun parziala da l'ordinaziun da finanzas per las vischnancas e messa en vigur per il 1. da schaner 2015. Dapi il 1. da schaner 2013 fan las vischnancas da pilot Arosa, Flem, Luzein, Tusaun e Vaz sut lur quint annual tenor il nov standard da rendaquint (MAC2). Las experientschas mussan ch'il basegn da revisiun è pitschen. Cun midar al MAC2 vegn da nov fixada l'obligaziun da far in rapport davart l'adattaziun da la bilantscha e da suttametter quest rapport al suveran per enconuschientscha. 

Indemnisà l'uniun Adebar per la cussegliaziun da gravidanza
La regenza grischuna ha approvà il nov contract da prestaziuns tranter il chantun Grischun e l'uniun Adebar. L'uniun Adebar vegn indemnisada per questa purschida cun ina contribuziun pauschala annuala da mintgamai 317 000 francs. La nova incarica da prestaziun vala fin la fin da l'onn 2018. Tenor la lescha federala davart ils posts da consultaziun per dumondas da gravidanza ston ils chantuns endrizzar posts per ina consultaziun cumplessiva. L'incumbensa d'endrizzar e da manar tals posts pon els surdar er ad organisaziuns privatas. La regenza ha delegà questa incumbensa a l'uniun Adebar. 

Projects da votaziun dals 8 da mars 2015
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia dals 8 da mars 2015:
- iniziativa dal pievel "Sustegnair las famiglias! Nagina taglia sin supplements per uffants e sin supplements da scolaziun";
- iniziativa dal pievel "Taglia sin l'energia empè da la taglia sin la plivalur".
Il medem di vegni er votà davart il suandant project chantunal:
- nov edifizi cumplementar da la mensa e da la mediateca per la scola chantunala sco er locals per la protecziun dals bains culturals per l'uffizi da cultura (credit d'impegn da 27 milliuns francs). 

Mess en vigur ina revisiun parziala concernent l'assicuranza per vegls, survivents ed invaliditad
La regenza ha mess en vigur per il 1. da schaner 2015 la revisiun parziala da la lescha introductiva tar las leschas federalas davart l'assicuranza da vegls e survivents e davart l'assicuranza d'invaliditad. 

Chareschia negativa, salaris fundamentals senza midadas
Ils salaris fundamentals da las collavuraturas e dals collavuraturs da l'administraziun chantunala e las tariffas da la salarisaziun minimala da las persunas d'instrucziun da las scolas popularas na vegnan betg midads per l'onn 2015. La regenza ha concludì da betg cumpensar la chareschia negativa per il 1. da schaner 2015.
A la fin da november 2014 importava l'index naziunal dals pretschs da consum 103,2 puncts. La differenza tar il stadi cumpensà da l'index da la fin da november 2010 (104,2 puncts) importa minus 1,0 puncts. Fin ad in stadi da l'index da 104,2 puncts vala la chareschia anc adina sco cumpensada. 
 

Da vischnancas e da regiuns 

• Alvra: La vopna da la nova vischnanca d'Alvra vegn approvada e declerada sco emblem uffizial da suveranitad da questa vischnanca. Il 1. da schaner 2015 entra en vigur la fusiun da las vischnancas d'Alvagni, Alvaschagn, Brinzauls, Casti, Mon, Stierva e Surava a la nova vischnanca d'Alvra.
• Panaduz: La revisiun parziala da la planisaziun locala, concludida da la vischnanca da Panaduz ils 20 da matg 2014, vegn approvada. Quella cumpiglia la revisiun parziala da la lescha da construcziun, il plan da zonas 1:10 000 "Elavuraziun posteriura da la planisaziun locala" sco er il plan general d'avertura 1:2000 "Provediment e dismessa, elavuraziun posteriura da la planisaziun locala". En il rom da questa elavuraziun posteriura da la planisaziun locala vegn determinada ina tschiffada d'aua sutterrana planisada che survegn in nov trassé per il conduct. Plinavant vegnan fatgas differentas correcturas areguard il tractament d'objects da proteger tenor la legislaziun davart la protecziun da la natira e da la patria (LPNP).
• Cuira: La revisiun da la lescha da taglia da la citad da Cuira dals 30 da november 2014 vegn approvada.
• Domat: Il project "Manaschi provisoric Val Parghera" vegn approvà sin basa da la lescha chantunala davart il guaud (LCG). I vegn garantida ina contribuziun da maximalmain 3,24 milliuns francs. Plinavant vegn approvà il project parzial "Gestiun da material deponia Plarenga". Per quest project vegn garantida ina contribuziun da maximalmain 1 566 000 francs.
• Tumleastga: La nova constituziun e la lescha da taglia, concludidas da la vischnanca da Tumleastga il 1. d'october 2014, vegnan approvadas. Plinavant vegn la vopna da la nova vischnanca da Tumleastga approvada e declerada sco emblem uffizial da suveranitad da questa vischnanca. Il 1. da schaner 2015 entra en vigur la fusiun da las vischnancas d'Almen, Pasqual, Pratval, Roten e Tumegl a la nova vischnanca da Tumleastga.
• Claustra-Serneus: La revisiun parziala da la planisaziun locala, concludida da la vischnanca da Claustra-Serneus ils 28 da settember 2014, vegn approvada. Quella cumpiglia il plan da zonas 1:2000 "Christlisch". La revisiun è il resultat da l'iniziativa "Christlisch bleibt grün".
• Tujetsch: La revisiun parziala da la planisaziun locala, ch'è vegnida concludida da la vischnanca da Tujetsch ils 31 d'avust 2014, vegn approvada cun resalvas. La revisiun parziala concerna ils projects per la gestiun da material Fallun e per l'explotaziun da gera Val da Claus.
• Zernez: La vopna da la nova vischnanca da Zernez vegn approvada e declerada sco emblem uffizial da suveranitad da questa vischnanca. Il 1. da schaner 2015 entra en vigur la fusiun da las vischnancas da Lavin, Susch e Zernez a la nova vischnanca da Zernez.

Contribuziuns chantunalas a differentas instituziuns 

• Uniun Movimento: La dumonda da l'uniun Movimento da cumprar l'immobiglia "Via da Mez 38" a Puschlav vegn approvada. Sin basa da la lescha d'integraziun da persunas cun impediments vegn garantida ina summa dad 1,012 milliuns francs per cumprar l'immobiglia. La purschida da l'uniun Movimento sa concentrescha sin umans cun impediments spiertals e psichics. Actualmain fan 36 persunas cun impediments diever da las plazzas da lavur protegidas e da las plazzas da structuras dal di da l'uniun Movimento en l'Incontro a Puschlav.
• Differentas federaziuns da sport: Totalmain 44 federaziuns da sport ed organisaziuns che fan part da l'associaziun grischuna da sport vegnan sustegnidas cun ina contribuziun totala dad 1 milliun francs. La regenza ha approvà la repartiziun da la contribuziun pauschala 2014 or dal fond da sport. Las contribuziuns vegnan pajadas cun la cundiziun che las federaziuns ed organisaziuns s'engaschian spezialmain per la promoziun dals giuvenils e per il sport d'uffants e da giuvenils.

Projects da vias
- Via da Jenins, vischnanca da Jenins: Il project per construir in passape per lung da la via da Jenins entaifer ed ordaifer il vitg da Jenins, traject plazza da parcar Chrüzli fin chasa da scola, vegn approvà cun cundiziuns. Als custs per construir il passape vegn pajada ina contribuziun chantunala da maximalmain 133 920 francs.
- H13 via taliana: Il project d'exposiziun per la correcziun da la via taliana, reparaziun Undrau fin colliaziun traversala Giuvaulta, vegn approvada cun cundiziuns e cun permissiuns spezialas. Il project prevesa principalmain da sanar trais construcziuns a spunda e d'optimar il concept d'allontanament da l'aua.
- Via da Brambrüesch, vischnanca da Churwalden: Sin la via da Brambrüesch vegn il traject spartavias Palusweg fin spartavias Farnusweg renconuschì sco via chantunala da colliaziun e surpiglià dal chantun sco proprietad e per il mantegniment. A partir dal 1. da matg 2015 è il mantegniment architectonic e funcziunal dal traject surpiglià lura chaussa da l'uffizi da construcziun bassa. 


Gremi: regenza
Funtauna: rg chanzlia chantunala dal Grischun