A sia ultima sesida ha la regenza grischuna approvà il project d'optimaziun da l'ovra electrica Tschar. Ultra da quai ha ella prendì posiziun davart il pachet agrar primavaira 2015 da la confederaziun.

La regenza beneventa las midadas dal pachet agrar primavaira 2015
L'uffizi federal d'agricultura ha proponì optimaziuns per exequir la lescha d'agricultura. La regenza sustegna questas midadas cun excepziun da l'ordinaziun d'allevament da muvel e da l'ordinaziun davart ils imports agriculs. En cas da l'ordinaziun d'allevament da muvel na duain ils meds finanzials federals betg vegnir impundids mo per simplifitgar l'execuziun, mabain er per promover l'allevament. Ultra da quai pretenda la regenza grischuna che l'augment permanent dals contingents da duana tar l'import da graun na daventia betg la regla. En vista a las finamiras surordinadas sco la suveranitad e la segirezza alimentara sto vegnir preferì il rinforz da la producziun naziunala da graun.

Approvà il project per l'ovra electrica Tschar
La regenza grischuna ha approvà il "project d'optimaziun da l'ovra electrica Tschar". Tar l'ovra electrica Tavanasa-Sursaissa en la Surselva è planisà in engrondiment dals implants existents sco er la realisaziun d'in stgalim d'ovra electrica sura supplementar. La quantitad d'electricitad che vegn producida en l'avegnir cuvra il basegn da circa 9000 chasadas en il chantun Grischun. Las investiziuns importan var 46 milliuns francs.

Legenda: Maletg da l'ovra electrica Tschar: vista da sut ensi nà dal letg da l'aual (sanestra), vista da nord (dretga)

La regenza beneventa las midadas da l'ordinaziun davart epidemias d'animals
La regenza grischuna beneventa che la confederaziun ordinescha ad ura mesiras uschè effizientas sco pussaivel per proteger ils avieuls cunter il bau pitschen da masainas (etina tumida). Pervia da ses traffic intensiv d'animals e da rauba è gist il chantun Grischun exponì al privel da quest parasit d'avieuls. En las vals dal sid Puschlav, Bregaglia e Val Müstair exista in viv traffic da cunfin local. Il bau pitschen da masainas è in parasit d'avieuls che maglia il mel, il pollen ed il cuaditsch d'avieuls. La stad 2014 è el vegnì cumprovà en l'Italia dal sid. Malgrà mesiras immediatas per al extirpar è quest bau s'etablì en l'Italia ed è sa derasà vinavant. Cun la midada da l'ordinaziun davart epidemias d'animals pon vegnir prendidas immediatamain mesiras en cas da suspect e d'epidemia.


Gremi: regenza
Funtauna: rg chanzlia chantunala dal Grischun