En ina nova broschura d'infurmaziun mussa il departament da giustia, segirezza e sanadad l'impurtanza che las persunas che tgiran lur confamigliars han per ils fatgs da sanadad dal chantun Grischun. La broschura dat vastas infurmaziuns a las persunas che tgiran lur confamigliars.

Sin fundament dal svilup demografic è in'assistenza adequata da persunas che basegnan tgira ina gronda sfida per il provediment da la sanadad dal chantun. I sto vegnir fatg quint ch'il basegn da tgira e d'assistenza che crescha ad in crescher na po a lunga vista betg pli vegnir garantì en moda suffizienta mo da las persunas spezialisadas per la tgira. La tgira tras confamigliars daventa perquai adina pli impurtanta e merita noss'attenziun.

Las persunas che tgiran lur confamigliars han savens sezzas in'activitad da gudogn. Tgirar confamigliars e pratitgar ina professiun il medem mument è ina sfida immensa. La tgira ed assistenza da confamigliars è ina chaussa engrevgianta per il corp sco er per la psica. En blers cas ha questa chargia effects negativs per la sanadad.

La broschura d'infurmaziun ch'è vegnida edida dal departament da giustia, segirezza e sanadad appreziescha la prestaziun da las persunas che tgiran lur confamigliars. Ella infurmescha ultra da quai davart las purschidas per distgargiar las persunas che tgiran lur confamigliars. Plinavant mussa la broschura cun tge mesiras che la confederaziun ed il chantun sustegnan las persunas che tgiran lur confamigliars. 


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Funtauna: rg departament da giustia, segirezza e sanadad
Funtauna: rg departament da giustia, segirezza e sanadad