Ils 16 da zercladur 2015 hai num per la sisavla giada: Parlament en moviment. A chaschun da la sessiun extra muros ad Arosa vegnan las deputadas ed ils deputads dal Grischun motivads da far sport da bun'ura. Ultra da quai survegnan ellas ed els ina invista da la "scola en moviment" d'Arosa.

Cumenzar cumenza il sport da bun'ura a las 06.30 tar la "scola en moviment" ad Arosa. Organisada vegn l'occurrenza da la gruppa parlamentara per sport, da l'uffizi da sanadad, da graubündenSPORT e da la "scola en moviment" d'Arosa. La finamira è quella da motivar las parlamentarias ed ils parlamentaris per ina moda da viver activa. Plinavant vegn explitgà il princip da la "scola en moviment". Las persunas d'instrucziun da "scolas en moviment" s'engaschan per ch'ils uffants ed ils giuvenils hajan regularmain moviment ed in nutriment equilibrà. Uschia prestan els ina contribuziun impurtanta a favur da la promoziun da la sanadad e da la prevenziun.
 
Il surpais è sin tut ils stgalims da scola in problem serius. La "scola en moviment" è vegnida iniziada tras il program d'acziun "Pais saun en il Grischun". Gia passa 100 chasas da scola en il Grischun s'engaschan per la promoziun dal moviment e per in nutriment saun. Ulteriuras scolas duain suandar. Il program d'acziun dal chantun per promover in pais saun tar uffants e tar giuvenils vegn prolungà fin l'onn 2019. En il center stattan mesiras che duain promover spazis attractivs per sa mover, per far sport e per giugar sco er purschidas d'alimentaziun saunas en canortas, scolinas, scolas e vischnancas.


Infurmaziuns: 
Denise Rudin, manadra da la partiziun "promoziun da la sanadad e prevenziun", uffizi da sanadad dal Grischun, tel. 081 257 64 02, e-mail Denise.Rudin@san.gr.ch  
 

Gremi: uffizi da sanadad dal Grischun
Funtauna: rg uffizi da sanadad dal Grischun