La regenza grischuna ha deliberà la missiva tar ina revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (LTM) per mauns dal cussegl grond. Persunas attempadas che vivan en relaziuns finanzialas difficilas duain pudair profitar da l'abitar assistì sco alternativa a l'entrada en ina chasa da tgira, sche l'intensitad da tgira permetta quai. La revisiun parziala gida uschia a realisar il princip "ambulant avant staziunar" da la politica da sanadad.

En il chantun Grischun exista ina buna purschida staziunara per persunas attempadas e per persunas che basegnan tgira. Er datti en il Grischun ina rait fitg buna da servetschs da la tgira ed assistenza a chasa. In basegn d'agir exista però tar las furmas d'abitar alternativas, en spezial tar l'abitar assistì. Persunas attempadas che na vulan u na pon betg pli viver a chasa malgrà lur pitschen basegn da tgira n'han oz savens nagina alternativa che d'entrar en ina chasa da tgira. Per che l'abitar assistì stettia a disposiziun en il futur er a persunas che vivan en relaziuns finanzialas difficilas, cuntegna il sboz da revisiun la basa per garantir prestaziuns supplementaras a locatarias ed a locataris d'abitaziuns assistidas.

L'abitar assistì cumbinescha abitaziuns da locaziun construidas uschia, ch'ellas n'han nagins obstachels, cun purschidas da sustegn e da tgira che vegnan messas a disposiziun u organisadas da las instituziuns. Las persunas che profitan da talas purschidas stattan en locaziun en questas abitaziuns e pon retrair ils servetschs da sustegn e da tgira tenor lur basegns. La construcziun d'abitaziuns che tegnan quint da la vegliadetgna è colliada cun custs supplementars. Quests custs supplementars pon las instituziuns metter a quint a las abitantas ed als abitants sur ina taxa da di. Ina caracteristica da l'abitar assistì è ultra da quai il fatg che las instituziuns garanteschan ina tgira da basa. Finanziada vegn er questa tras ina taxa da di che vegn messa a quint a las abitantas ed als abitants.

Cun la revisiun parziala qua avant maun vegn stgaffida la basa per ch'ils custs supplementars possian vegnir indemnisads tras las prestaziuns supplementaras a las locatarias ed als locataris che vivan en relaziuns finanzialas difficilas. La regenza fixescha in'autezza maximala per talas prestaziuns supplementaras. La premissa per indemnisar quests custs è il basegn da la locataria u dal locatari da survegnir prestaziuns da tgira, d'assistenza u da tegnairchasa tras in servetsch da la tgira ed assistenza a chasa u tras ina tgirunza diplomada renconuschida. Ultra da quai sto l'instituziun esser renconuschida dal chantun. Per survegnir questa renconuschientscha chantunala sto l'instituziun ademplir tschertas premissas architectonicas (concepziun che resguarda la vegliadetgna) sco er garantir la tgira da basa.

Grazia als custs pli bass da l'abitar assistì cumpareglià cun ina chasa da tgira gida la revisiun parziala qua avant maun a moderar ils custs dals fatgs da sanadad.

Igl è previs da tractar la missiva en il cussegl grond durant la sessiun da december 2015.


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Gremi: regenza
Funtauna: rg chanzlia chantunala dal Grischun