La cumissiun per politica da stadi e strategia dal cussegl grond ha predeliberà la missiva da la regenza pertutgant la finanziaziun da las baselgias en il chantun Grischun. Ella recumonda al cussegl grond d'approvar il rapport.

La cumissiun per politica da stadi e strategia dal cussegl grond ha predeliberà la missiva da la regenza pertutgant la finanziaziun da las baselgias en il chantun Grischun. Quai sut la direcziun dal president da la cumissiun Maurizio Michael (Castasegna) ed en preschientscha dal president da la regenza Martin Jäger sco schef dal departament d'educaziun, cultura e protecziun da l'ambient. Preschents èn stads plinavant represchentants da las baselgias chantunalas evangelic-refurmada e catolica. Il cussegl grond vegn a tractar il rapport en la sessiun d'october 2015.

Il president da la regenza e las persunas responsablas per las duas baselgias chantunalas han l'emprim infurmà davart il rapport e davart la prognosa dal svilup finanzial a media ed a lunga vista sco er davart las consequenzas colliadas cun quai, resguardond ina consideraziun da las ristgas. En la discussiun posteriura èn vegnids tractads pli detagliadamain tranter auter temas sco las taglias da baselgia da las persunas natiralas e las taglias da cultus, las immobiglias ecclesiasticas e lur mantegniment sco er il dumber da commembras e commembers ed eventualas tendenzas da svilup. La cumissiun è unanimamain da l'avis che las activitads da las baselgias chantunalas sajan d'in interess public considerabel e che las baselgias duajan vegnir mantegnidas sco instanzas socialas. En il giudicament final suonda la cumissiun l'avis da la regenza, tenor il qual il sistem vertent per finanziar las baselgias duaja restar.

La cumissiun propona al cussegl grond da prender enconuschientscha en moda affirmativa dal rapport.


Infurmaziuns:
Maurizio Michael (Castasegna), president da la cumissiun per politica da stadi e strategia, tel. 079 798 90 92


Gremi: cumissiun per politica da stadi e strategia
Funtauna: rg cumissiun per politica da stadi e strategia