La regenza sustegna il nov urden da finanzas 2021 da la confederaziun. Plinavant vesa ella in basegn d'agir areguard las spezias d'animals e da plantas exoticas invasivas, ed ella beneventa il project d'ina staziun da pandemias en l'ospital chantunal.

La regenza sustegna il nov urden da finanzas 2021 da la confederaziun
La regenza grischuna ha prendì posiziun tar il conclus federal davart il nov urden da finanzas 2021. Tras la refurma da l'urden da finanzas duain las finanzas federalas vegnir messas sin ina basa solida er suenter l'onn 2020. Concretamain duai vegnir abolida la limitaziun temporara da la taglia sin la plivalur (TPV) e da la taglia federala directa (TFD). Quai permettess a la confederaziun da pudair incassar permanentamain las duas taglias.
La regenza grischuna sustegna ils plans da cuntinuar cun l'urden da finanzas vertent senza limitar la durada da la taglia federala directa e da la taglia sin la plivalur. Cun renunziar a la limitaziun temporara, ch'è actualmain fixada fin la fin da l'onn 2020, vegnissan las duas funtaunas d'entradas principalas da la confederaziun segiradas a lunga vista. Las duas taglias èn incontestadas ed indispensablas. Ina nova limitaziun temporara sto vegnir refusada. Ils chantuns èn participads cun ina quota da 17 pertschient a la taglia federala directa. Questa taglia ha pia ina impurtanza directa er per ils chantuns.
La regenza beneventa plinavant il project concis ch'è vegnì preschentà per il nov urden da finanzas. Da novs elements vegni desistì. I na faschess nagin senn d'iniziar novs projects da refurma fiscals. Il project current da la refurma da l'imposiziun da taglia sin interpresas III (RTI III) è gia ina grond plazzal che dovra conturns uschè stabils sco pussaivel.
La regenza sustegna plinavant la tenuta da la conferenza da las directuras e dals directurs chantunals da finanzas (CDF).

Posiziun da la conferenza da las directuras e dals directurs chantunals da finanzas

La regenza vesa in basegn d'agir areguard las spezias d'animals e da plantas exoticas invasivas
La regenza ha prendì posiziun davart la strategia da la Svizra en connex cun spezias exoticas invasivas e vesa in grond basegn d'agir. Cuntrari a las spezias d'animals e da plantas indigenas che vivan tar nus da natira anora, èn las spezias exoticas arrivadas tar nus tras l'influenza da l'uman. Ellas pon periclitar la sanadad e chaschunar donns. Sin fundament d'ina intervenziun parlamentara ha l'uffizi federal d'ambient (UFAM) elavurà ina strategia da cumbat.
Cumbain che la derasaziun d'intginas spezias ha gia pudì vegnir impedida cumprovadamain en il Grischun cun agid d'ina strategia chantunala, èn autras spezias exoticas sa derasadas pli e pli fitg ils ultims onns. Plinavant s'augmentan vinavant ils facturs d'influenza negativs sco il commerzi global, il traffic internaziunal, la midada dal clima e l'utilisaziun dal terren.
La regenza grischuna beneventa l'intenziun da la confederaziun d'obligar er ils proprietaris ed ils cultivaturs da bains immobigliars da cumbatter cunter las plantas exoticas invasivas. Il medem vala per ils servetschs da mantegniment da las viafiers, da las vias e da las auas. Ord vista da la regenza exista in basegn d'agir urgent tar la coordinaziun dals differents acturs, tar l'identificaziun tempriva sco er tar l'armonisaziun da las basas giuridicas. Medemamain sto la strategia furnir las premissas necessarias per la deliberaziun da resursas finanzialas e persunalas. En cas ch'ins na chatta nagins chaschunaders, duain questas premissas esser la basa per reparter proporziunalmain ils custs tranter la confederaziun ed ils chantuns.

Cumbat cunter la darsvenna giganta

La regenza beneventa il project d'ina staziun per cumbatter cunter pandemias en l'ospital chantunal
La regenza approvescha il project d'ina staziun centrala per cumbatter cunter pandemias en l'ospital chantunal dal Grischun. Ella propona al cussegl grond da conceder a l'ospital chantunal dal Grischun ina contribuziun d'investiziun extraordinaria en furma d'in credit d'impegn per cuvrir ils custs dad 1,7 milliuns francs.
En il rom dal project da construcziun SUN (sanaziun, renovaziun e construcziun nova) ch'è actualmain en curs prevesa l'ospital chantunal dal Grischun tranter auter da realisar ina nova chasa da letgs per la clinica d'uffants. En questa chasa duai vegnir concepì in plaun sco staziun cun 18 chombras d'isolaziun per cumbatter cunter pandemias. Particularmain en vista a la ristga d'ina eventuala pandemia menziunada en l'analisa chantunala da la periclitaziun pari ord vista da la regenza raschunaivel da preparar en l'ospital chantunal ina staziun per cumbatter cunter pandemias, che stat a disposiziun a l'entir chantun. En il cas normal vegnan las chombras d'isolaziun duvradas sco chombras da letgs normalas da la clinica d'uffants. Cun plazzar la staziun en in lieu central en l'ospital chantunal dal Grischun pon ins concentrar ils meds medicinals necessaris per l'entir chantun ed applitgar quels en moda effizienta. Uschia vegn difficultada u en il meglier cas impedida la derasaziun d'ina pandemia en l'entir chantun gia en la fasa iniziala. Ulteriuras staziuns per cumbatter cunter pandemias na vegnan betg duvradas en il chantun.

La regenza approvescha classas da talents a la scola da la citad da Cuira
La regenza grischuna ha dà la permissiun per manar classas da talents a Cuira. Il concept inoltrà da la scola da la citad prevesa ina scola da talents sin il stgalim superiur per uffants cun duns sportivs u musicals. Cun in urari spezial survegnan las scolaras ed ils scolars talentads la pussaivladad da trenar respectivamain d'exercitar pli savens. La classa da talents vegn introducida successivamain entaifer trais onns, e quai a partir da l'onn da scola 2016/2017. Sper la scola populara da Tavau, la scola da talents Surselva e la scola sportiva Champfèr è la scola da la citad da Cuira gia la quarta scola che porscha ina classa da talents en il chantun Grischun. Tenor la nova lescha da scola dovran las instituziuns ch'èn responsablas per la scola ina permissiun da la regenza per manar classas da talents.

La regenza approvescha ina contribuziun chantunala per construir ina nova serenera a Brail, vischnanca da Zernez
A la vischnanca da Zernez vegn garantida ina contribuziun chantunala da maximalmain circa 194 000 francs per remplazzar la serenera existenta e per construir ina nova serenera a Brail.
La serenera Brail è vegnida messa en funcziun l'onn 1984. Dapi sia avertura n'èn vegnidas fatgas naginas sanaziuns e prendidas naginas mesiras per il mantegniment da la valur. Il project da construcziun nov prevesa perquai da remplazzar la serenera existenta e da construir ina nova serenera. La capacitad da la serenera vegn dublegiada. Plinavant vegn construì in batschigl d'aua da plievgia, quai che mancava fin ussa. Cun las lavurs da construcziun duai vegnir cumenzà anc quest onn. Las lavurs da construcziun duain esser finidas la fin da l'onn 2016.


Gremi: regenza
Funtauna: rg chanzlia chantunala dal Grischun