La regenza grischuna suttametta al parlament il preventiv 2016 cun in deficit da 50,8 milliuns francs. Il preventiv observa per gronda part las directivas da la politica da finanzas dal cussegl grond. Exceptads èn sulettamain spustaments da grevezzas da las vischnancas al chantun. En il preventiv vegn resguardada la refurma da la gulivaziun da finanzas. Quella vegn ad entrar en vigur per il cumenzament da l'onn proxim. En vista al svilup inegual da las expensas e da las entradas resta la situaziun da la politica da finanzas ina gronda sfida.

L'onn 2016 sto il chantun dumagnar pajaments pli bass da la gulivaziun da finanzas da la confederaziun NGF. Da Berna vegnan ad arrivar 17 milliuns damain meds finanzials da gulivaziun che durant l'onn current. Questa perdita è la consequenza da la reducziun da la gulivaziun da las resursas ch'è vegnida concludida dal parlament federal per la proxima perioda da quatter onns 2016–2019 sco er d'ina fermezza da las resursas levamain pli auta dal Grischun per l'onn 2016.

La regenza quinta che la banca naziunala svizra na vegnia betg a distribuir in gudogn per l'onn da fatschenta current e ch'il chantun vegnia a manchentar 16 milliuns durant l'onn da preventiv. Las finanzas publicas dal Grischun èn marcadas er l'onn proxim per gronda part da pajaments da contribuziun – sco pajadras e sco retschavidras.

Preventiv 2016

• En il resultat total fa la regenza quint cun in deficit dal preventiv da 50,8 milliuns. Suenter la deducziun da las amortisaziuns supplementaras che pon vegnir fatgas sin fundament da las prescripziuns da rendaquint dal MAC2 è il resultat ch'è decisiv per la valur directiva 46,7 milliuns. Sco che la directura da finanzas Barbara Janom Steiner ha explitgà a las medias han stuì vegnir fatgas stretgas prescripziuns a l'administraziun per pudair concepir il preventiv entaifer las limitas.
• Las singulas gruppas tematicas en il quint economic ed en il quint d'investiziun èn per part pertutgadas da midadas pli grondas che restrenschan ina cumparegliaziun cun ils resultats da l'onn precedent. La refurma da la gulivaziun da finanzas valaivla a partir dal 1. da schaner 2016 chaschuna ina nova structura dals contos. Las midadas pervia da la revisiun parziala da la lescha da finanzas ch'è vegnida concludida il zercladur 2015 han a partir da l'onn 2016 medemamain consequenzas per cudeschar las contribuziuns.
• Ils custs da persunal s'augmentan en cumparegliaziun cun il preventiv da l'onn precedent per 0,9 pertschient a 368 milliuns. La summa dals salaris s'augmenta per il minimum dad 1 pertschient tenor la lescha da persunal. En vista a las prognosas ed en vista a la cumpensaziun da chareschia ch'è vegnida concedida auters onns sin in stadi da l'index pli aut na quinta la regenza betg cun in'adattaziun dals salaris chaschunada pervia da l'inflaziun.
• La diminuziun cumprovada dals custs da transfers (1119 milliuns, -66 milliuns) è mo da natira contabla e vegn chaschunada da las midadas menziunadas. Las contribuziuns a communitads ed a terzas persunas importan l'onn proxim 888 milliuns. D'agiuntar èn las amortisaziuns cumplettas sin las contribuziuns d'investiziun (128 milliuns). Pervia da la refurma da la gulivaziun da finanzas s'augmentan las contribuziuns per 29 sin 81 milliuns. Las taglias sin il gudogn e sin il chapital da las vischnancas (l'anteriura taglia supplementara) vegnan regladas a partir da l'onn fiscal 2015 mo pli sur la bilantscha dal chantun, e quai pervia da la midada da sistem. Ellas n'influenzeschan betg pli il resultat dal quint economic.
• Las contribuziuns transitoricas sa reduceschan per 73 milliuns. Cun l'introducziun dal fond per l'infrastructura da viafier (FIV) crodan davent las indemnisaziuns d'infrastructura a la Viafier retica (VR) che gievan a favur dal manaschi e da las amortisaziuns.
• Tar il retgav fiscal vegni fatg quint cun in retgav da taglia pli aut tar las persunas natiralas (+47 milliuns u +9,6 %). En cumparegliaziun cun il retgav ch'è vegnì cudeschà en il quint annual 2014 signifitga quai in lev augment (+7,5 milliuns). Tar las persunas giuridicas resta il preventiv sin il nivel da l'onn precedent.
• Il chantun cuntinuescha cun la politica d'investiziun paschaivla. L'onn proxim duain vegnir pajads brutto 400 milliuns. Sin l'emprima egliada èn quai bain passa 37 milliuns damain che en il preventiv da l'onn precedent. La diminuziun pertutga dentant las contribuziuns d'investiziun transitoricas cumprovadas. Las contribuziuns da la confederaziun a l'infrastructura da la VR na vegnan betg pli regladas sur il quint d'investiziun dal chantun, e quai pervia dal nov fond per l'infrastructura da viafier (FIV). Las contribuziuns d'investiziun s'augmentan pervia da la nova separaziun da contribuziuns en il quint economic ed en il quint d'investiziun (contribuziuns als ospitals ed a las scolas medias privatas).
• La renovaziun da las vias principalas e vias da colliaziun vegn a custar al chantun l'onn proxim 106 milliuns. 14 milliuns èn previs per il sviament da Küblis che vegn avert l'onn 2016. Quai è l'ultim project da vias naziunalas ch'il chantun realisescha. Per il mantegniment architectonic e funcziunal da la rait da vias chantunalas vegnan planisads 110 milliuns. Il chantun alimentescha la finanziaziun speziala vias cun assegnar ad ella il retgav net da l'uffizi per il traffic sin via (81 milliuns) e la contribuziun minimala da meds publics generals ch'è senza midadas tenor la lescha (19 milliuns). Vitiers vegnan differentas contribuziuns federalas (cunzunt la taxa sin il traffic pesant dependenta da la prestaziun TTPDP e la taglia sin ielis minerals). Tut en tut vegn budgetà in deficit da stgars 20 milliuns per il quint da las vias. Quest deficit va sin donn e cust dal dabun da las vias (stadi per la fin da l'onn 2014: 101 milliuns).

Plan da finanzas 2017–2019
La planisaziun da finanzas presuma deficits che creschan fermamain a partir da l'onn 2018. In dischequiliber structural sa mussa. Ils pegiuraments dals resultats vegnan chaschunads en emprima lingia tras custs da transfers pli auts (contribuziuns a terzas persunas sco er amortisaziuns da las contribuziuns d'investiziun). Sche las premissas na vegnan betg midadas, mussan las contribuziuns a persunas privatas per las premias da l'assicuranza da malsauns, las contribuziuns als ospitals ed a las clinicas, las contribuziuns d'investiziun a las chasas da tgira sco er las prestaziuns supplementaras in'auta dinamica. Betg anc cuntegnidas èn las eventualas consequenzas finanzialas dal program da la regenza 2017–2020 ch'è actualmain en elavuraziun.

La planisaziun è colliada cun diversas malsegirezzas e cun ristgas che na pon betg vegnir numnadas en cifras. Cunzunt da la vart dal retgav sco er pervia da svilups sin plaun federal na sa laschan differents elements strusch predir. Quests elements cumpiglian las consequenzas e las mesiras che ston vegnir realisadas areguard la refurma da l'imposiziun da taglia sin interpresas III ubain che resultan perquai ch'i vegnan prendidas eventualas mesiras da distgargia per stabilisar las finanzas federalas. Ils retgavs fiscals chantunals dependan fermamain da las consequenzas dal svilup da l'economia publica e da las cundiziuns generalas per l'economia d'export, da turissem e da construcziun.  

La regenza è pronta da prender las mesiras per meglierar las cundiziuns generalas da l'economia publica ch'il cussegl grond ha pretendì e da cuntinuar cun l'auta activitad d'investiziun er durant ils onns da planisaziun. L'aut nivel da las expensas chaschuna però ina deflussiun da la liquiditad ch'è avant maun e – sch'i dat gronds deficits – ina reducziun da l'agen chapital. Il favrer 2016 vegn la regenza a suttametter al cussegl grond il nov program da la regenza ed il plan da finanzas 2017–2020. Ensemen cun quest program vegn il cussegl grond a fixar novas prescripziuns che servan sco directivas da la politica da finanzas per la nova perioda da planisaziun, e quai sa basond sin ina preschentaziun generala pli detagliada da la politica da finanzas.

Il cussegl grond vegn a tractar il preventiv 2016 en la sessiun da december 2015.


Ulteriuras infurmaziuns davart il preventiv 2016 dattan:
- Cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: Barbara.Janom@dfg.gr.ch
- Andrea Seifert, manader da l'administraziun da finanzas, tel. 081 257 33 01,  e-mail: Andrea.Seifert@five.gr.ch


Gremi: regenza
Funtauna: rg chanzlia chantunala dal Grischun