En sia ultima sesida ha la regenza prendì posiziun tar la revisiun da la lescha federala davart il dretg da burgais sco er tar la midada da la lescha davart las scolas politecnicas federalas. Ultra da quai ha ella approvà l'ovra da protecziun en la Val Parghera.

La regenza ha prendì posiziun tar la midada da la lescha davart las SPF
La regenza grischuna ha prendì posiziun tar ina revisiun parziala da la lescha federala davart las scolas politecnicas federalas. Las adattaziuns da la lescha pertutgan tranter auter las taxas da studi ed eventualas restricziuns d'admissiun. Per augmentar la capacitad da scolaziun per medias e medis, ch'è necessaria en Svizra, examinescha la SPF Turitg d'introducir in studi da bachelor che duai pussibilitar l'access al studi da master en medischina ad in'universitad chantunala. Sche la confederaziun accreditescha in tal studi, duai il cussegl da las SPF avair la pussaivladad da concluder restricziuns d'admissiun per quest rom per tut las studentas ed ils students. Quai duai ademplir oravant tut l'intent da betg sutminar il numerus clausus che vala a las autras universitads.
La regenza grischuna beneventa l'introducziun d'in tal studi da bachelor en medischina che metta in accent sin la scienza natiral tecnica. Ella dubitescha però, sche la generaziun giuvna che vegn duvrada per il provediment medicinal da basa, possia vegnir scolada cun in tal studi. Quai era oriundamain la finamira da la pretensiun per dapli plazzas da studi.

La regenza prenda posiziun tar la revisiun da la lescha federala davart il dretg da burgais
La regenza grischuna prenda posiziun tar l'ordinaziun davart la nova lescha davart il dretg da burgais. L'ordinaziun regla oravant tut ils criteris d'integraziun per ina natiralisaziun sco er las proceduras da natiralisaziun che appartegnan a la cumpetenza federala. Ultra da quai vegnan adattadas las taxas da la confederaziun.
La regenza grischuna è da l'avis che l'ordinaziun adempleschia las finamiras fixadas, en spezial la concretisaziun dals criteris d'integraziun. Pervia dal nov dretg federal sto la lescha dal dretg da burgais vertenta però vegnir revedida totalmain sin plaun chantunal. La regenza grischuna pretenda da resguardar quai cun fixar la data da l'entrada en vigur dal nov dretg federal. En il chantun Grischun vegniss en dumonda il pli baud mez 2017 sco termin. Plinavant n'è la regenza grischuna betg perencletga cun las novas tariffas da taxas. Fin ussa vegn il chantun da domicil indemnisà cun mintgamai 300 francs per dumonda, e quai per far ils scleriments en il rom da natiralisaziuns facilitadas e per la redacziun dal rapport da retschertga. Questa tariffa duai vegnir auzada a maximalmain 350 francs. Ma la lavur administrativa da las autoritads chantunalas na po gia oz betg vegnir cuvrida. En l'avegnir ston las autoritads chantunalas far scleriments anc pli detagliads. Perquai èsi inditgà d'augmentar la taxa a 500 francs.

La regenza approvescha l'ovra da protecziun en la Val Parghera
La regenza grischuna approvescha cun intginas cundiziuns il project da l'ovra da protecziun en la Val Parghera sco er la correctura da la via taliana. Per l'ovra da protecziun vegn garantida ina contribuziun chantunala da circa 9,4 milliuns francs.
Las bovas che sa distatgan en la Val Parghera pericliteschan la via chantunala (via taliana) H13), la via naziunala N13 e la lingia da la Viafier retica sco er ils areals d'abitadi e da mastergn cunfinants che sa chattan sin il territori da la vischnanca da Domat e da la citad da Cuira. La finamira dal project qua avant maun è quella da reducir la ristga ad ina dimensiun supportabla, e quai cun impunder meds finanzials adequats.
L'element central è la construcziun d'in nov collectur da gera cun in volumen da 140 000 m3 fin 170 000 m3. Quest collectur vegn construì a l'ur sut dal cugn alluvial, directamain sur ils objects ch'èn da proteger. Qua sa chatta gia oz in pitschen collectur che n'ademplescha però betg las pretensiuns tecnicas futuras e che sto vegnir remplazzà tras la nova ovra da construcziun. Supplementarmain ston vegnir construids rempars da deviaziun che chanaliseschan sistematicamain la bova e che la tegnan uschia sut controlla.
Per stgaffir la plazza ch'è necessaria per il collectur da gera sto la via taliana existenta vegnir spustada var 40 meters vers engiu. L'aua dal collectur da gera vegn allontanada sco fin ussa sur in chanal da deflussiun en direcziun dal Rain alpin.


Nagins projects chantunals da votaziun ils 28 da favrer 2016
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia dals 28 da favrer 2016:
- iniziativa dal pievel "Per la lètg e la famiglia – Na als dischavantatgs per pèrs maridads"
- iniziativa dal pievel "Per il repatriament effectiv da las persunas estras criminalas (iniziativa per il repatriament effectiv)"
- iniziativa dal pievel "Nagina speculaziun cun nutriment!"
- midada da la lescha federala davart il traffic da transit sin via en il territori da las Alps (LTTV) (sanaziun dal tunnel da via tras il Gottard).
I na dat nagins projects chantunals, davart ils quals i vegn votà quest di.


Gremi: regenza
Funtauna: rg chanzlia chantunala dal Grischun