A sia ultima sesida ha la regenza approvà las contribuziuns da la gulivaziun da finanzas 2015. Ultra da quai duai vegnir cuntinuà cun il project "ARGE ALP sport. La finala ha la regenza concedì ina contribuziun per construir l'infrastructura da passlung a Tavau.

La regenza prenda posiziun tar la "finanziaziun da la gestiun e dal mantegniment da la substanza da l'infrastructura da viafier 2017-2020"
L'uffizi federal da traffic (UFT) realisescha ina procedura da consultaziun tar la "finanziaziun da la gestiun e dal mantegniment da la substanza da l'infrastructura da viafier 2017-2020". I sa tracta dal mantegniment e da la renovaziun da l'entira infrastructura da viafier en Svizra. Ils chantuns pajan per quai contribuziuns annualas en l'autezza da var 500 milliuns francs.
La conferenza dals directurs chantunals dal traffic public (CTP), da la quala fa part er il chantun Grischun, ha redigì ina posiziun cuminaivla en chaussa. La regenza grischuna sustegna dal tuttafatg las explicaziuns correspundentas da la CTP. Oravant tut è la CTP s'occupada da l'aspect da la chareschia e pretenda che l'onn 2016 vegnia duvrà sco basa dals custs per calcular la chareschia.

Posiziun da la conferenza dals directurs chantunals dal traffic public

La regenza approvescha las contribuziuns da la gulivaziun da finanzas 2015
Per contribuziuns da gulivaziun a favur da vischnancas finanzialmain deblas sco er per promover fusiuns da vischnancas vegnan pajads l'onn 2015 circa 42,28 milliuns francs (onn precedent: 50,7 milliuns francs). La summa sa cumpona sco suonda:
- per la gulivaziun da la forza fiscala 2015 vegnan pajads totalmain circa 16,87 milliuns francs a 39 vischnancas;
- per contribuziuns ad ovras publicas vegnan pajads radund 7,98 milliuns francs;
- sut il titel "gulivaziun dal basegn spezial" vegnan pajads tut en tut var 1,65 milliuns francs a 5 vischnancas;
- per contribuziuns da promoziun a fusiuns da vischnancas vegnan pajads totalmain circa 15,78 milliuns francs.
Las contribuziuns da la gulivaziun da finanzas vegnan distribuidas l'onn 2015 l'ultima giada tenor il sistem vegl. La refurma da la gulivaziun da finanzas (refurma da la GF), ch'il pievel grischun ha approvà ils 28 da settember 2014, remplazza a partir dal 1. da schaner 2016 la veglia legislaziun davart la gulivaziun da finanzas.

Revisiun parziala da las disposiziuns executivas tar la lescha chantunala da sustegn
La regenza ha approvà la revisiun parziala da las disposiziuns executivas tar la lescha chantunala da sustegn. Tras l'adattaziun vegn l'agid social per part calculà da nov a partir dal 1. da schaner 2016. Uschia vegn tranter auter reducì il basegn fundamental da chasadas da sis persunas u dapli, e quai per 76 francs per persuna e mais. Plinavant vegnan reducidas da 986 francs a 789 francs las tariffas per persunas giuvnas creschidas fin 25 onns cun in'atgna chasada.
La revisiun parziala è stada necessaria, perquai che la Conferenza svizra da las directuras e dals directurs chantunals dals affars socials ha concludì il settember d'adattar las "Directivas per la concepziun e per la calculaziun da l'agid social" (directivas da la COSAS). Las directivas nunliantas da la COSAS defineschan, co che l'agid social vegn calculà, ed ellas daventan liantas pir tras la legislaziun chantunala.

Ulteriuras infurmaziuns: Conferenza svizra da l'agid social

Mess en vigur duas leschas
A chaschun da sia sesida ha la regenza concludì da metter en vigur ils suandants relaschs:
- La revisiun parziala da la lescha da finanzas (LFC) vegn messa en vigur per il 1. da schaner 2016. Ultra da quai ha la regenza approvà la revisiun parziala da l'ordinaziun da finanzas dal chantun Grischun. Ella cumpiglia singulas adattaziuns en il rendaquint dal chantun. A partir da l'onn 2016 duain las entradas da taglia vegnir cudeschadas en la contabilitad il mument da la facturaziun (e betg pli durant l'onn fiscal) e las contribuziuns chantunalas il mument dal pajament (e betg pli il mument da la garanzia).
- La revisiun parziala da la lescha davart l'organisaziun giudiziala vegn medemamain messa en vigur per il 1. da schaner 2016. La revisiun parziala cuntegna l'augment dal dumber da commembras e commembers da la dretgira chantunala dal Grischun per ina derschadra u in derschader en uffizi cumplain.

Cun il project "ARGE ALP sport" duai vegnir cuntinuà
Il chantun Grischun vegn a proponer a la cuminanza da lavur da las regiuns alpinas (ARGE ALP) da cuntinuar cun il project "ARGE ALP sport" fin l'onn 2022. Davart la cuntinuaziun definitiva dal program da sport decida lura la conferenza da las scheffas e dals schefs da las regenzas da la cuminanza da lavur da las regiuns alpinas la stad 2016.
En il rom da quest project vegnan realisadas mintga onn concurrenzas en nov disciplinas da sport specificas per las Alps, inclusiv in'occurrenza da sport per persunas cun impediments. Las concurrenzas han lieu en differents pajais commembers da la ARGE ALP e vegnan organisadas en moda decentrala, dentant en furma unitara. Il project stat sut la direcziun da la partiziun "sport" da l'uffizi per la scola populara ed il sport dal chantun Grischun. Dapi ch'il program da sport da la ARGE ALP è vegnì lantschà l'onn 1983, ha el gì passa 75 000 participantas e participants. Qua tras è el ina da las pitgas las pli impurtantas da la collavuraziun internaziunala entaifer la ARGE ALP.

Contribuziun per construir l'infrastructura da passlung a Tavau
La regenza conceda a la vischnanca da Tavau ina contribuziun chantunala dad 1 milliun francs per construir l'infrastructura da passlung. Tranter auter duai vegnir adattà il trassé da la loipa, amplifitgada l'ennavada da la pista dal cup mundial ed augmentada la capacitad da l'uschenumnà snow-farming (conservar la naiv durant la stad). Ultra da quai è planisà in nov edifizi d'infrastructura.
L'utilisaziun dal stabiliment è er d'impurtanza ord vista dal turissem. D'ina vart èsi da far quint cun pernottaziuns supplementaras, da l'autra vart vegn meglierà il potenzial da passlung gia existent a Tavau ed uschia l'attracziun internaziunala ch'è colliada cun quai.
Il chantun po pajar contribuziuns per construir e per renovar stabiliments da sport d'impurtanza naziunala, sche quels èn cuntegnids en il concept per implants da sport d'impurtanza naziunala (CISIN) e sch'els vegnan correspundentamain promovids da la confederaziun. Il CISIN ha l'intent da mantegnair u da stgaffir bunas premissas per las federaziuns naziunalas da sport en il sectur dals stabiliments da sport d'impurtanza naziunala.
Visualisaziun da l'edifizi d'infrastructura planisà


Gremi: regenza
Funtauna: rg chanzlia chantunala dal Grischun