La regenza ha decidì d'incumbensar l'uffizi da sanadad cun la gestiun da la centrala dal clom d'agid sanitar 144. Ella desista da surdar la gestiun a l'ospital chantunal dal Grischun, che ha inoltrà en la submissiun l'offerta la pli favuraivla ord vista economica. Il provediment da la regiun d'ospital tras il servetsch da salvament da l'ospital regiunal da la Surselva resta garantì.

Ils suandants motivs han incità la regenza da laschar manar en l'avegnir il chantun la centrala 144:

• La centrala 144 è l'element central dal provediment medicinal en cas d'urgenza en il chantun. Sin la glista da las infrastructuras criticas da la Svizra da l'uffizi federal da protecziun da la populaziun figureschan las centralas d'acziuns dals servetschs da salvament sin il medem stgalim sco las centralas da la polizia e dals pumpiers.
• Uschenavant che quai è enconuschent vegnan las centralas dal clom d'agid sanitar manadas en tut ils auters chantuns dal maun public sez.
• La segirezza da manaschi po vegnir procurada sez.
• Sche la gestiun vegn surdada ad ina terza part, è il chantun dependent da quella, uschia che la segirezza da manaschi e la segirezza respectiva dal provediment da la populaziun e dals giasts na pon eventualmain betg vegnir garantidas.
• Areguard il dretg da persunal è la situaziun per las collavuraturas ed ils collavuraturs da la centrala 144 la medema sco per las collavuraturas ed ils collavuraturs da la centrala operativa da la polizia chantunala.

Questa decisiun correspunda a la recumandaziun da la cumissiun chantunala da salvament.

L'offerta da l'ospital chantunal dal Grischun è stada la pli favuraivla
Il december 1998 ha la regenza surdà la gestiun da la centrala 144 a l'ospital regiunal da la Surselva a Glion. En il rom da la procedura da submissiun aveva l'ospital regiunal da la Surselva inoltrà l'offerta la pli favuraivla. Il contract correspundent era vegnì concludì per ina durada illimitada, fixond in termin da desditga da 24 mais. Il 1. da fanadur 1999 ha la centrala dal clom d'agid sanitar 144 a Glion avert sia gestiun.

Cunquai ch'il contract tranter il chantun e l'ospital regiunal da la Surselva ha durà tut en tut gia passa 16 onns e perquai ch'in tal servetsch sto vegnir scrit or periodicamain, ha la regenza concludì ils 7 da december 2015 da desdir il contract per ils 31 da december 2017.

Ils 15 da favrer 2016 ha l'uffizi da sanadad scrit or publicamain en ina procedura averta l'incarica da servetsch per la gestiun da la centrala dal clom d'agid sanitar 144 en il chantun Grischun. Offertas èn vegnidas inoltradas da l'ospital chantunal dal Grischun e da l'ospital regiunal da la Surselva. L'offerta da l'ospital chantunal dal Grischun è stada pli favuraivla ord vista economica. En cas d'ina surdada ad ina terza part avess la gestiun da la centrala 144 consequentamain stuì vegnir attribuida a l'ospital chantunal.

Situaziun actuala tar la centrala 144
Pervia da difficultads gravantas da persunal tar la centrala 144 èn vegnidas prendidas il cumenzament da matg mesiras immediatas a chaschun d'ina scuntrada cuminaivla da l'ospital regiunal da la Surselva, dal chantun e da la centrala 144. L'uffizi da sanadad ha mess a disposiziun ad interim ina da sias collavuraturas per la direcziun da la centrala 144, perquai che l'ospital n'era betg en cas d'engaschar ina persuna da ses agen manaschi per questa incarica.

La regenza ha lura incumbensà l'uffizi da sanadad da negoziar cun l'ospital da Glion in'annullaziun tempriva dal contract current pertutgant la gestiun da la centrala 144. Quai en vista al fatg che la gestiun da la centrala 144 a Glion vegn – sco quai ch'er l'ospital regiunal da la Surselva admetta – mantegnida mo cun stentas extremas pervia da la sutdotaziun da persunal, tras quai che las collavuraturas ed ils collavuraturs prestan uras supplementaras e renunzian a vacanzas, e perquai ch'ins ristga uschia in collaps dal manaschi en consequenza da strapatsch sco er en cas d'eventualas ulteriuras desditgas. Uschia pudess la centrala 144 vegnir reunida gia en il decurs da l'onn 2017 cun la centrala d'acziuns da la polizia chantunala. Ils 25 da matg 2016, en il rom d'ina discussiun cun il schef dal departament da sanadad, ha il president dal cussegl d'administraziun da l'ospital regiunal da la Surselva demussà che l'ospital saja pront da far las contractivas correspundentas.

Dischlocaziun da la centrala 144 n'ha naginas consequenzas per ils servetschs da salvament dals ospitals
La dischlocaziun da la centrala 144 per il 1. da schaner 2018 u eventualmain pli baud n'ha naginas consequenzas per il provediment tras il servetsch da salvament da la regiun d'ospital da la Surselva sco er da las autras regiuns d'ospital.
Tenor la lescha per promover la tgira da persunas malsaunas èn ils ospitals obligads da manar per lur regiun d'ospital in servetsch da transport effizient en cas d'urgenza e d'ambulanza. L'ospital regiunal da la Surselva ha pia l'incumbensa da manar il servetsch da salvament er suenter la dischlocaziun da la centrala 144. Per quest intent survegn el ina contribuziun proporziunala dal credit global che vegn mess a disposiziun dal cussegl grond per il servetsch da transport da persunas malsaunas e disgraziadas dals ospitals.

Il departament da sanadad suttametta las actas a la cumissiun da gestiun
Sin fundament da las renfatschas exprimidas en las medias ha il departament da giustia, segirezza e sanadad envidà la cumissiun da gestiun d'examinar detagliadamain ils andaments en connex cun las mesiras d'urgenza ch'èn vegnidas prendidas per garantir la gestiun da la centrala dal clom d'agid sanitar.


Infurmaziuns:
president da la regenza Christian Rathgeb, schef dal departament da giustia, segirezza e sanadad dal Grischun, tel. 081 257 25 01 (cuntanschibel per telefon l'avantmezdi)


Gremi: regenza
Funtauna: rg chanzlia chantunala