La regenza grischuna ha deliberà il sboz per ina revisiun totala da la lescha da sanadad per mauns dal cussegl grond. L'intent da la revisiun da la lescha da sanadad è quel da proteger e da promover la sanadad da la populaziun.

La nova lescha da sanadad remplazza la lescha vertenta che datescha da l'onn 1984 e tegna quint dal svilup che ha gì lieu dapi lura en ils fatgs da sanadad publics. La sistematica da la lescha vegn meglierada envers la lescha vertenta. Ultra da quai vegnan integradas disposiziuns cumplementaras, en spezial en il sectur da las obligaziuns da las persunas spezialisadas e dals manaschis dal sectur da la sanadad sco er dals dretgs e da las obligaziuns da las pazientas e dals pazients. En connex cun la revisiun totala vegn fixada detagliadamain la repartiziun da las incumbensas tranter il chantun e las vischnancas, ed il dretg chantunal en ils secturs da la prevenziun, dal cumbat cunter epidemias e da l'execuziun da la professiun da las persunas spezialisadas dal sectur da la sanadad vegn adattà a las prescripziuns dal dretg federal. L'adattaziun da las disposiziuns chantunalas al dretg federal ha per consequenza che mintga persuna che pratitgescha sia professiun en l'atgna responsabladad professiunala sto avair en il futur ina permissiun per pudair far quai. E quai independentamain dal fatg, sch'ella ha in'activitad da gudogn independenta u sch'ella è engaschada, per exempel en in ospital.

Il project tar la revisiun totala da la lescha da sanadad ha gì – cun paucas excepziuns – in resun fitg positiv en la consultaziun. La necessitad d'ina revisiun totala da la lescha da sanadad cun adattar las disposiziuns chantunalas a la regulaziun dal dretg federal n'è en general betg stada contestada. La buna legibladad e la structura clera, survesaivla e logica dal sboz da lescha èn vegnidas remartgadas da bleras instanzas participadas a la consultaziun sco puncts positivs. Il giavisch da las instanzas participadas a la consultaziun da betg limitar areguard il temp las permissiuns per pratitgar la professiun da las persunas spezialisadas dal sectur da la sanadad è vegnì resguardà.

Cun 70 artitgels ha la nova lescha da sanadad mo 18 artitgels dapli che la lescha da sanadad vertenta, e quai malgrà singulas repetiziuns dal cuntegn e malgrà la regulaziun dals dretgs da las pazientas e dals pazients. Envers il sboz da consultaziun è la lescha vegnida scursanida per 5 artitgels, ulteriurs 55 artitgels crodan davent perquai ch'ils suandants relaschs vegnan abolids:

• lescha davart las vaccinaziuns preventivas publicas cunter malsognas transmissiblas
• ordinaziun executiva tar la lescha federala davart il cumbat cunter malsognas transmissiblas da l'uman e tar las ordinaziuns federalas relaschadas latiers
• ordinaziun davart ils fatgs da sepultura

Il project vegn tractà dal cussegl grond en la sessiun d'avust 2016.


Infurmaziuns:
president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch


Gremi: regenza
Funtauna: rg chanzlia chantunala