Suenter ina planisaziun d'execuziun d'in onn vegn lantschada la construcziun dal stabiliment giudizial serrà a Realta cun l'emprima badigliada tradiziunala. La realisaziun da l'ovra da construcziun gronda e cumplexa vegn a durar circa trais onns. Igl è previs da metter en funcziun l'edifizi vers la fin da l'onn 2019

L'avust 2015 ha il cussegl grond approvà il project per la construcziun d'in nov stabiliment per l'execuziun giudiziala serrada, per l'arrest d'inquisiziun e per l'orticultura a Realta, che cumpiglia custs bruts da 119 milliuns francs, e concedì in credit d'impegn dad 86 milliuns francs. La confederaziun da sia vart sustegna il project da construcziun cun ina contribuziun da construcziun garantida da 33 milliuns francs.

Durant in onn èn vegnids elavurads – en stretga collavuraziun tranter il team da project enturn ils architects Jüngling e Hagmann, Cuira, l'uffizi per l'execuziun giudiziala e l'uffizi da construcziun auta – il project da construcziun e la planisaziun d'execuziun. Las enconuschientschas las pli novas, novaziuns tecnicas ed ils svilups dal project èn vegnids integrads cuntinuadamain en il process da planisaziun.

Realisà vegn in stabiliment giudizial serrà cun tut en tut 152 plazzas. Da quellas èn 10 plazzas en la partiziun d'entrada, 100 plazzas per l'execuziun normala, 20 plazzas per delinquents cun disturbis psichics sco er 10 plazzas en la partiziun da vegliadetgna. Totalmain 12 plazzas èn previsas per l'execuziun da l'arrest d'inquisiziun, per l'execuziun da chastis da dunnas e da giuvenils sco er per chastis da detenziun subsidiars.

Project d'execuziun
L'edifizi nov projectà dal stabiliment giudizial serrà è caracterisà d'ina zona exteriura marcanta cun in mir da betun da 7 meters autezza e cun pliras saivs da metal. Questa zona impedescha l'evasiun, dentant er l'invista d'ordaifer. L'entir volumen da construcziun è structurà en trais cubus. L'edifizi principal situà a l'ost cumpiglia ils secturs d'abitar, da mangiar e da durmir da las execuziuns respectivas en gruppa sco er il sectur d'assistenza, d'administraziun e da persunal. En il cumplex d'edifizis situà al vest e levamain distanzià chattan suttetg ils secturs industria/mastergn e temp liber/sport. Il terz tract sa chatta al nord tranter l'edifizi da mastergn e l'edifizi principal e cumpiglia las stanzas da persunal, la spediziun, il magasin sco er la cuschina. Tranter ils edifizis èn situads, tut tenor la situaziun da segirezza, curtins da spassegiar che pon vegnir separads.
Il concept architectonic e logistic ademplescha per l'ina las pretensiuns legalas da l'execuziun giudiziala e las pretensiuns cumplexas d'in standard da segirezza uschè aut sco pussaivel. Per l'autra sustegna el dentant er ils praschuniers durant il process da resocialisaziun aspirà, porscha bunas cundiziuns da lavur als collavuraturs da l'instituziun e pussibilitescha andaments da manaschi effizients e favuraivels.

La vischnanca da Cazas ha dà il matg 2016 la permissiun da construcziun per il project grond. En in'emprima fasa da construcziun vegnan spustadas las lingias d'infrastructura, deviads ils auals da la val ed i vegn cumenzà cun la construcziun da l'edifizi cumpensatoric per l'orticultura.

la construcziun d'in nov stabiliment per l'execuziun giudiziala Realta

L'execuziun da chastis en Svizra ha problems da capacitad
A Realta vegn creà in center giudizial modern che vegn a gidar essenzialmain a garantir la segirezza publica. Sin plaun naziunal mancan oz circa 980 plazzas en l'execuziun serrada. En il territori da cunvegna dals chantuns da la Svizra orientala davart l'execuziun da chastis e da mesiras, da la quala er il chantun Grischun fa part, mancan almain 140 plazzas d'execuziun supplementaras. Las decleraziuns d'intenziun en scrit dals chantuns Son Gagl e Turitg accentueschan che quests dus chantuns vegnan ad occupar duraivlamain in grond dumber da plazzas da praschuniers.

Impurtanza per l'economia publica
Tras la realisaziun dal stabiliment giudizial planisà resulta en spezial per la regiun Tumleastga/Mantogna in potenzial da valurisaziun considerabel. La nova praschun vegn a dar lavur a circa 110 persunas. Da quai ston var 80 plazzas vegnir occupadas dal tuttafatg da nov – circa 30 plazzas existentas vegnan transferidas da la praschun dal Sennhof. Er il mastergn dal conturn vegn a pudair profitar da la domiciliaziun da questa praschun dal concordat da la Svizra orientala. Er ord vista da l'economia publica è il nov edifizi perquai da gronda impurtanza per il chantun Grischun.


Infurmaziuns:
cusseglier guvernativ dr. Mario Cavigelli, tel. 081 257 36 01, e-mail: Mario.Cavigelli@bvfd.gr.ch  


Gremi: uffizi da construcziun auta dal Grischun
Funtauna: rg uffizi da construcziun auta dal Grischun