Dapi dus onns e mez reglan la confederaziun ed ils chantuns la promoziun specifica da l'integraziun en il rom da programs chantunals d'integraziun cun la finamira da promover pli sistematicamain l'integraziun da persunas estras en tut ils secturs da la vita. In nov video da la chanzlia chantunala dal Grischun dat ina invista en la promoziun da l'integraziun en il chantun Grischun.

Cun il program chantunal d'integraziun (2014 – 2017) èn la confederaziun ed il chantun s'obligads da rinforzar lur stentas per integrar persunas estras en ils secturs "infurmaziun e cussegliaziun", "furmaziun e lavur" sco er "chapientscha ed integraziun sociala" e da formular las finamiras correspundentas. Quellas tanschan da las emprimas infurmaziuns per persunas che sa tiran natiers da nov sur la promoziun linguistica per persunas creschidas e per uffants en la vegliadetgna prescolara fin a las translaziuns interculturalas u l'integraziun en il martgà da lavur.

Il post spezialisà per l'integraziun da l'uffizi da migraziun e da dretg civil maina e coordinescha en quest connex ils secturs da promoziun correspundents sco er la direcziun strategica da la promoziun chantunala da l'integraziun. Plinavant conceda el contribuziuns finanzialas a projects ed a purschidas che s'orienteschan als basegns, sco curs da lingua e curs d'integraziun che sustegnan il process d'integraziun da las persunas estras che vivan en il chantun resp. che pussibiliteschan l'access a las purschidas da las structuras regularas sco scola, sistem da furmaziun, martgà da lavur e sectur da sanadad e stgaffeschan uschia perspectivas per tuts.

Sco post da contact, da cussegliaziun e da coordinaziun promova il post spezialisà il barat ed il contact tranter instituziuns chantunalas e communalas sco er tranter ulteriurs acturs relevants per l'integraziun sco organisaziuns da migrantas e da migrants. Cun il center d'infurmaziun per l'integraziun (InfoInt) stat a disposiziun a tut las abitantas ed abitants dal chantun Grischun ina purschida d'infurmaziun cumplessiva en cas da dumondas pertutgant il tema integraziun en il sectur da migraziun.

Ulteriuras infurmaziuns: post spezialisà per l'integraziun dal Grischun


Infurmaziuns:
Patricia Ganter, incumbensada chantunala d'integraziun e manadra dal post spezialisà per l'integraziun, tel. 081 257 36 81, e-mail Patricia.Ganter@afm.gr.ch  


Gremi: uffizi da migraziun e da dretg civil
Funtauna: rg uffizi da migraziun e da dretg civil