Suenter in temp da construcziun da circa 4 onns po il sviament Glion vest vegnir surdà al traffic en il rom d'ina festa d'avertura. Betg pli stuair spetgar ditg davant la barriera da viafier a Glion – il nov sviament distgargia Glion dal traffic da transit e deliberescha il center da la citad da situaziuns da traffic dischagreablas.

Il nov sviament cun ina lunghezza da var 700 meters al vest da Glion serva d'ina vart sco access a la part sid da la citad e facilitescha da l'autra vart il viadi en las regiuns turisticas Val S. Pieder, Lumnezia e Sursaissa. Las duas rundellas ch'èn vegnidas construidas per la via sursilvana e per la via da la Lumnezia permettan – ensemen cun la punt dal Rain "Glion vest" che ha ina lunghezza da 267 meters – ina reducziun previsibla dal traffic quotidian en media a Glion da ca. 9400 sin 4600 vehichels. Ils custs da quest project da construcziun importan ca. 26 milliuns francs.

Ulteriuras infurmaziuns davart il sviament Glion vest chattais Vus en il fegl d'infurmaziun actual da l'uffizi da construcziun bassa dal Grischun.

Fotografia agiuntada:
 
Il nov sviament Glion vest


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch


Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun