Ier ha il cusseglier guvernativ Christian Rathgeb scuntrà a Tavau en il center da transit per in discurs da lavur l'assessura da la provinza autonoma Bulsaun – Tirol dal sid Martha Stocker, ch'è responsabla per dumondas d'asil.

La visita da lavur en il chantun Grischun ha servì a tgirar ils contacts tranter las duas regiuns ed a barattar ideas en dumondas d'asil. En il rom da la visita ha il cusseglier guvernativ Christian Rathgeb dà a l'assessura Martha Stocker ed a sia delegaziun ina invista dal center da transit Landhaus a Tavau. D'in interess spezial è stà il svilup sin il sectur d'asil al cunfin svizzer sco er il barat d'infurmaziuns.

Il fanadur 2017 aveva gia gì lieu ina visita da lavur dal cusseglier guvernativ Rathgeb tar l'assessura Stocker a Bulsaun. Là avevan il cusseglier guvernativ Rathgeb e la secretaria dal departament Regula Hunger pudì inspectar las structuras primaras e secundaras da la provinza autonoma Bulsaun – Tirol dal sid.

Fotografia agiuntada:

L'assessura Martha Stocker e il cusseglier guvernativ Christian Rathgeb


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad