La regenza ha approvà la revisiun totala da l'ordinaziun chantunala davart il vin sco er la prolungaziun da la scolaziun al gimnasi da l'Academia Engiadina. Ultra da quai ha ella dà glisch verda per l'engrondiment d'in rempar da lavinas a Mustér.
La regenza ha revedì l'ordinaziun chantunala davart il vin
La regenza ha approvà la revisiun totala da las disposiziuns executivas tar l'ordinaziun davart la viticultura e l'import da vin (ordinaziun chantunala davart il vin). Cun la revisiun vegn stgaffida la basa per che vins che vegnan producids en il Tessin cun iva dal Mesauc dastgian vegnir vendids sut la denominaziun d'origin controllada "DOC Ticino". Ultra da quai vegnan concretisads ils criteris prescrits da la confederaziun che ston vegnir resguardads per giuditgar la qualificaziun da surfatschas da viticultura. La revisiun totala da l'ordinaziun davart il vin entra en vigur il 1. da mars 2018.
Dapi decennis vegn ina gronda part da l'iva che vegn producida en il Mesauc torclada en il chantun Tessin. En quest connex vegn questa iva er duvrada per far vins tessinais cun la denominaziun d'origin controllada (DOC Ticino). Cun la revisiun totala qua avant maun vegn il dretg grischun concepì uschia ch'ils viticulturs mesolcinais pon vender lur iva vinavant a producents da vin tessinais che fan cun questa iva vins che portan la denominaziun d'origin controllada "DOC Ticino". Perquai che betg tut ils viticulturs e producents da vin en il Mesauc na drizzan lur producziun tenor il chantun Tessin, vegni er garantì che viticulturs mesolcinais pon duvrar ina denominaziun d'origin controllada tenor il dretg grischun sco "DOC Grigioni Mesolcina".
Commembra da project supplementara per elavurar il concept per promover la cultura
La regenza ha nominà Aixa Andreetta, commembra da la cumissiun chantunala da cultura, a partir d'immediat sco ulteriura commembra da project supplementara per elavurar il concept per promover la cultura. Il concept duai preschentar la situaziun actuala da la promoziun da la cultura en il chantun Grischun, definir puncts centrals per la politica da promoziun sco er mussar vias e mesiras per cuntanscher las finamiras prendidas en mira (situaziun previsa).
La gruppa da project per elavurar quest concept sa preschenta da nov sco suonda: cusseglier guvernativ Martin Jäger, manader dal project, Rita Schmid, accumpagnadra externa dal project, Barbara Gabrielli, manadra da l'uffizi da cultura, Aixa Andreetta, Gianna Olinda Cadonau e Christian Albrecht, commembers da la cumissiun chantunala da cultura, Andreas Leisinger, president da l'uniun museums grischuns sco er Nikolaus Schmid, president da l'associaziun dals creaturs dal teater independent ACT (gruppa regiunala dal Grischun).
Scolaziun per sport e musica pli lunga a l'Academia Engiadina
La regenza ha approvà il reglament davart la prolungaziun da la scolaziun al gimnasi da l'Academia Engiadina. Per sportistas e sportists spezialmain talentads ed orientads a la prestaziun sco er per musicistas e musicists da la partiziun gimnasiala duain da nov vegnir prolungads ils ultims trais onns a quatter onns. L'ultim temp è il squitsch dal sport sin atletas ed atlets adina pli giuvens s'augmentà adina pli fitg. Quai ha chaschunà ina grevezza memia gronda. Il concept da la scolaziun prolungada duai pussibilitar en spezial a sportistas ed a sportists da prestaziun talentads da persequitar lur finamiras sportivas senza stuair acceptar deficits tar l'acquist da la furmaziun gimnasiala. Il nov reglament entra en vigur il 1. d'avust 2018.
Il rempar da lavinas a Mustér po vegnir engrondì
La regenza ha approvà in project da la vischnanca da Mustér per engrondir il rempar da lavinas Val Clavaniev e garantescha per quai ina contribuziun da maximalmain 397 500 francs. Il rempar da lavinas ch'exista en il nordvest dal territori communal protegia parts da l'abitadi da Clavaniev. En il rom da las inspecziuns annualas èsi vegnì constatà ch'ina gronda part da las plantas emplantadas tranter ils rempars temporars dals territoris parzials Plaun Tir e Val Mala è morta u na sa sviluppa betg bain. Mesiras tecnicas duain ussa garantir la protecziun dal territori d'abitadi fin ch'il guaud po ademplir sia funcziun da protecziun. Per quest intent vegnan construids stgalims sin ina lunghezza da circa 2 kilometers che duain reducir la pressiun dal terren sin quest territori. Plinavant duain 400 chavalluts da trais chommas e novas emplantaziuns proteger quest territori.
©Adrian Deragisch
La via da Bazolis en il Partenz po vegnir amplifitgada
La regenza ha approvà il project per la correcziun da la via da Bazolis, traject Ottenacher – Flippen Boden, cun permissiuns spezialas e cundiziuns. La via da Bazolis, ina via chantunala da colliaziun, sa chatta en in territori abità sparpaglià ch'è tipic per il Partenz. Ils ultims onns èn mo vegnidas fatgas las lavurs da mantegniment. Perquai n'è la via betg en in bun stadi. Tras la correcziun planisada duai la via da Bazolis vegnir renovada totalmain e vegnir schlargiada da nov a 4,2 meters. Questa extensiun dal profil traversal po vegnir cuntanschida senza novas construcziuns artifizialas mo cun emplenidas da la vart da la val e cun applaniments da la vart da la muntogna. Ils custs per la correcziun da la via importan circa 1,2 milliuns francs.
Projects da votaziun dals 10 da zercladur 2018
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 10 da zercladur 2018:
- iniziativa dal pievel dal 1. da december 2015 "Per daners segirs en ina crisa: emissiuns monetaras mo da la Banca naziunala! (iniziativa per il daner cumplain)";
- lescha federala dals 29 da settember 2017 davart gieus per daners (lescha da gieus per daners).
Sin plaun chantunal n'èn nagins projects madirs per la votaziun dals 10 da zercladur 2018. Percunter han lieu las elecziuns da renovaziun da la regenza sco er dal cussegl grond. Questas elecziuns ha la regenza fixà gia ils 25 d'avrigl 2017 ed ils 19 da december 2017.
Gremi: regenza
Funtauna: rg chanzlia chantunala dal Grischun