La tgira da monuments dal Grischun, il servetsch archeologic dal Grischun e la protecziun da la patria dal Grischun organiseschan mintga onn en collavuraziun cun partenaris regiunals e locals ils Dis europeics dal monument en il Grischun. Andeer, il lieu da concurrenza da quest onn, porscha la pussaivladad da s'occupar cun la ritgezza da las fassettas da noss patrimoni cultural e da tgirar la discussiun davart la cultura architectonica tranter la populaziun e persunas spezialisadas.

Sut il motto "Senza cunfins" sa participescha la Svizra per la 25avla giada als Dis europeics dal monument. Il medem mument celebrescha la confederaziun l'onn 2018 sco onn dal patrimoni cultural e prenda quai sco motiv per realisar ils Dis dal monument betg sco usità mo la segunda fin d'emna da settember, mabain a quatter fins d'emna dal settember en differentas regiuns da la Svizra. La tscherna dad Andeer sco lieu da concurrenza central en il Grischun stat en connex cun il giubileum da 200 onns da l'engrondiment da la via taliana a la via commerziala.

Andeer posseda in maletg dal vitg d'impurtanza naziunala. Il vitg guarda sin ina lunga istorgia da svilup, en la quala mancan per fortuna las grondas catastrofas destructivas sco per exempel ils incendis dal vitg ch'èn fitg derasads en il Grischun. Singulas chasas èn mantegnidas bain, schebain ch'ellas han ina bella vegliadetgna. L'istorgia da lur possessurs e da lur utilisaziun n'è en blers cas anc betg sclerida. Dal tuttafatg en il senn da la participaziun culturala propagada l'onn dal matrimoni cultural dattan possessuras e possessurs da talas immobiglias ad Andeer ils 8 da settember al public interessà invista en las localitads ed en l'istorgia da lur chasas. Per grond e pitschen porschan las collavuraturas ed ils collavuraturs da la tgira da monuments dal Grischun girs tras il vitg cun differents accents tematics tar l'istorgia, tar il maletg dal vitg e tar la substanza architectonica preziusa. Il servetsch archeologic dal Grischun mussa originals d'objects chattads en il territori per lung da la via taliana e maina en il cuvel da cult misterius sper Ziràn. La protecziun da la patria dal Grischun ed il post spezialisà per la cultura Cultura Viamala drizzan – cun lur occurrenzas pertutgant la via taliana sco exempel – l'interess sin las vias da communicaziun istoricas sco patrimoni cultural prezius.

Ils Dis dal monument da quest onn vegnan averts sonda, ils 8 da settember 2018 a las 10.00, tar la chasa da scola dad Andeer. I salvan in pled il cusseglier guvernativ e schef dal departament d'educaziun, cultura e protecziun da l'ambient Martin Jäger, il president communal dad Andeer Hans-Andrea Fontana sco er Simon Berger en num da l'organisaziun dals tgiraders chantunals da monuments.

Agiunta:
fegl sgulant cun il program

Ulteriuras infurmaziuns:
www.dpg.gr.ch e www.hereinspaziert.ch


Infurmaziuns:
Simon Berger, tgirader chantunal da monuments / tgira da monuments / uffizi da cultura, tel. 081 257 27 91, e-mail Simon.Berger@dpg.gr.ch


Gremi: uffizi da cultura
Funtauna: rg uffizi da cultura