En preschientscha d'ina represchentanza da las victimas ha cusseglier guvernativ Jon Domenic Parolini inaugurà e surdà oz a la publicitad il "lieu da commemoraziun per las persunas pertutgadas en il Grischun da mesiras repressivas per motivs da provediment e da plazzaments en in lieu ester". Cun stgaffir in lieu da commemoraziun vul la regenza gidar ch'il passà na crodia betg en emblidanza.

Il november passà è cusseglier guvernativ Jon Domenic Parolini sa perstgisà en num da la regenza tar las victimas da mesiras repressivas per motivs da provediment per las dolurs subidas. En il rom da l'occurrenza commemorativa da quella giada è vegnì emplantà in nuscher en la vischinanza da la stalla dal Waldhaus sco segn da regurdientscha.

Lieu da commemoraziun cun vista en l'avegnir
Per la regenza èsi impurtant che l'istorgia da las mesiras repressivas per motivs da provediment en il Grischun vegnia elavurada. Perquai ha ella installà l'avust 2017 ina gruppa da persunas pertutgadas e da persunas spezialisadas per stgaffir in degn lieu da commemoraziun. En collavuraziun cun l'artist ed architect da Cuira Gion Signorell ha il chantun planisà e realisà l'onn passà il lieu da commemoraziun. Il lieu duai gidar che quai ch'è capità na crodia betg en emblidanza, ed el duai porscher a las persunas pertutgadas la pussaivladad d'elavurar ils eveniments dal passà. La bella vista sur la Val dal Rain da Cuira envida da drizzar il sguard er vers l'avegnir.

L'analisa da las mesiras repressivas per motivs da provediment en il Grischun n'è cun quai betg finida. L'onn 2020 è planisada en il museum retic in'exposiziun davart il tema da la povradad e da las mesiras repressivas per motivs da provediment. Per ch'il tema possia vegnir accumpagnà da studentas e students sco er da persunas spezialisadas vegn preparà material d'instrucziun e da scolaziun en il rom da l'exposiziun. Il lieu da commemoraziun sa chatta a l'ur dal Fürstenwald sper la stalla dal Waldhaus (chantunada Fürstenwaldstrasse/Prasserieweg) ed è da tut temp accessibel al public.

Ulteriuras infurmaziuns:
L'agid a victimas dal Grischun è il post da consultaziun per persunas directamain pertutgadas da mesiras repressivas per motivs da provediment e da plazzaments en lieus esters fin l'onn 1981. El po vegnir consultà gratuitamain sut il numer da telefon 081 257 31 50 u sur l'adressa dad e-mail opferhilfe@soa.gr.ch.


Infurmaziuns:
cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: departament d'economia publica e fatgs socials
Funtauna: rg departament d'economia publica e fatgs socials