La Posta svizra metta a disposiziun ses sistem dad e-voting futur per in test d'intrusiun public dals 25 da favrer fin ils 24 da mars 2019. I sa tracta da l'emprim sistem svizzer ch'è verifitgabel cumplettamain. Persunas interessadas da tut il mund pon attatgar il sistem e contribuir uschia a sia segirezza.

Dapi l'onn 2004 fan ils chantuns, sa basond sin il dretg federal, experiments cun la votaziun electronica per votaziuns federalas. Ussa ha la Posta svizra sviluppà in sistem cun ina verificabilitad cumpletta. La verificabilitad cumpletta permetta in'applicaziun pli vasta dal e-voting. Ella garantescha che sbagls sistematics tar las funcziuns pervia da sbagls da la software, da sbagls umans u d'emprovas da manipular vegnan scuvrids. Tenor las pretensiuns dal dretg federal sto quest sistem vegnir certifitgà avant l'emprima applicaziun ed il code da funtauna sto vegnir publitgà.

La confederaziun ed ils chantuns vulan in test tras la communitad dals hackers
Ultra da quai han la confederaziun ed ils chantuns decidì che sistems dad e-voting verifitgabels cumplettamain stoppian vegnir suttamess ad in test d'intrusiun public avant l'emprima applicaziun. En cas d'in test d'intrusiun (numnà er test da penetraziun) vegn examinada la segirezza cun attatgar il sistem. In test d'intrusiun vegn gia fatg d'in post accredità en il rom da la certificaziun. Cun il test d'intrusiun public po ussa vegnir controllada la segirezza supplementarmain d'in grond dumber da persunas.

La confederaziun ed ils chantuns han relaschà pretensiuns cuminaivlas per il test d'intrusiun public. Quellas obligheschan ils purschiders da sistems da metter a disposiziun lur sistem durant 4 emnas per il test. La communitad dals hackers duai empruvar da manipular vuschs, da leger vuschs consegnadas sco er da metter ord funcziun u da guntgir mesiras da segirezza che protegian las vuschs e datas ch'èn relevantas per la segirezza. Sco basa per quests tests ston vegnir publitgads ordavant la documentaziun da sistem ed il code da funtauna.

La Posta svizra metta a disposiziun ses sistem per in test d'intrusiun public dals 25 da favrer fin ils 24 da mars 2019. La firma SCRT ch'è spezialisada sin tests d'intrusiun vegn a registrar per incumbensa da la confederaziun e dals chantuns las persunas che sa participeschan. Ella valitescha er ils resuns e prenda posiziun tar tals uschè svelt sco pussaivel.

Indemnisaziun finanziala per annunzias spezialmain preziusas da largias da segirezza
La confederaziun ed ils chantuns pajan sur il plan da prioritads dad e-government Svizra ina contribuziun da 250 000 francs al test d'intrusiun public. Da quels èn previs 150 000 francs sco contribuziun als custs totals da la Posta svizra. La lavur ed ils custs da SCRT vegnan indemnisads cun 100 000 francs. Annunzias spezialmain preziusas da largias da segirezza duain vegnir indemnisadas finanzialmain. La Posta svizra fixescha l'autezza d'eventualas indemnisaziuns ed è cumpetenta per il pajament.

Persunas che s'interessan per ina participaziun pon sa registrar sur https://onlinevote-pit.ch per survegnir ulteriuras infurmaziuns davart las modalitads dal test.

Il chantun Grischun spetga cun in interess spezialmain grond sin ils resultats dal test d'intrusiun. Il chantun intenziunescha da cumenzar l'onn 2020 cun il e-voting tenor il sistem da la Posta en sis vischnancas da pilot. La premissa per quai è tranter auter ch'il test d'intrusiun haja gì success.

Agiuntas:
- FAQ davart il test d'intrusiun
- pretensiuns da la confederaziun e dals chantuns als tests d'intrusiun publics


Infurmaziuns:
Daniel Spadin, chancelier, chanzlia chantunala, tel. 081 257 22 21, e-mail Daniel.Spadin@staka.gr.ch  


Gremi: chanzlia chantunala
Funtauna: rg chanzlia chantunala