Ils proxims 4 onns sanescha l'uffizi da construcziun bassa dal Grischun en etappas il traject Viamala da la via taliana. Il project prevesa da renovar tut las punts, las gallarias ed ils mirs da sustegn sco er la surstructura da la via. Las lavurs da construcziun vegnan probablamain realisadas en quatter etappas annualas da l'onn 2019 fin l'onn 2022. L'onn 2023 duain avair lieu las lavurs da finiziun.

La via da sauma da 360 onns da Tusaun a Clavenna, che maina tras la chavorgia da la Viamala è oz ina via culturala ch'è classifitgada en il "inventari federal da las vias da communicaziun istoricas da la Svizra" (IVS) sco trassé istoric d'impurtanza naziunala. Perquai vegn resguardada spezialmain la valur istorica da las ovras da construcziun.

Renovaziun e sviament
La via da la Viamala vegn utilisada fermamain da las visitadras e dals visitaders da la chavorgia e serva ultra da quai sco traject da sviament en cas d'eveniments sin la via naziunala. Ensemen cun la reparaziun da las punts, da las gallarias e dals mirs da sustegn vegn er renovada la surstructura da la via da tut il perimeter dal project. Pervia da l'influenza nuschaivla da la schelira e dal sal da sdregliada sco er pervia da las frequenzas dal traffic è la surstructura da la via en in stadi manglus.

Renovaziun da la passarella da peduns e dals conducts d'ovra
Pervia da las stretgas relaziuns da spazi n'èsi strusch pussaivel da meglierar il trassé, uschia ch'il nov trassé suonda per gronda part la via existenta. Ina nova passarella da peduns meglierescha l'access dal parcadi al center da visita. Ils lieus ils pli stretgs vegnan mitigiads minimalmain. En spezial vegni guardà da mantegnair il caracter dal traject da la via, da resguardar ils giavischs da la tgira da monuments e d'adattar la via optimalmain a las relaziuns existentas. En il corpus da la via sa chattan conducts d'ovra da las Ovras electricas dal Rain posteriur SA, da la Cooperativa da manaschi ViamalaInfra e da la Swisscom SA, ils quals vegnan er sanads.

Il Fegl d'infurmaziun da l'uffizi da construcziun bassa dal Grischun cuntegna infurmaziuns detagliadas davart las etappas planisadas, davart las serradas e davart ils sviaments. La charta e la glista actuala dals plazzals pon vegnir consultadas sut www.strassen.gr.ch. Ellas cuntegnan medemamain indicaziuns davart las lavurs e davart ils impediments sin las vias chantunalas en il Grischun.

Fotografia:

Gallaria Viamala 1, gallaria da lain Viamala


Infurmaziuns:
- Reto Knuchel, inschigner chantunal, uffizi da construcziun bassa dal Grischun, tel. 081 257 37 01, e-mail Reto.Knuchel@tba.gr.ch  
- Josef Kurath, manader da project per il mantegniment da las construcziuns artifizialas, uffizi da construcziun bassa dal Grischun, tel. 081 257 37 41, e-mail Josef.Kurath@tba.gr.ch


Gremi: uffizi da construcziun bassa
Funtauna: rg uffizi da construcziun bassa