Il chantun Grischun ha preschentà il nov rapport "Prevenziun cunter incendis da guaud 2030". En il Grischun daventa il privel d'incendis da guaud en l'avegnir pli acut pervia da la midada dal clima cun temperaturas pli chaudas e pervia da periodas da setgira pli lungas. Perquai èn vegnids analisads ed evaluads detagliadamain ils incendis gronds dals onns passads sco er tratgas conclusiuns per l'avegnir.

Il rapport "Prevenziun cunter incendis da guaud 2030" mussa las mesiras necessarias che garanteschan che largias existentas vegnian serradas, che structuras ch'èn sa cumprovadas vegnian rinforzadas e che tut ils acturs sajan abels d'agir svelt ed en moda effizienta en in cas d'incendi. Las mesiras cumpiglian investiziuns en l'infrastructura da stizzar fieu e meglieraziuns da l'organisaziun e da l'infurmaziun. Ils proxims 10 onns duain vegnir investids circa 20 milliuns francs en la prevenziun cunter incendis da guaud ed en il cumbat cunter il fieu. Questas investiziuns èn necessarias per avair ina buna basa er en l'avegnir.

Emprendì dals incendis gronds
Mintga onn datti en il chantun Grischun 10 fin 20 incendis da guaud. Tut tenor las relaziuns climaticas e tut tenor il svilup da l'aura brischi en ils guauds dal Grischun differentamain savens ed en differenta dimensiun da regiun a regiun. Il svilup dal clima dals ultims onns conferma la supposiziun che las periodas da setgira daventan pli frequentas. L'incendi grond da Bumaun 2016/17 a Soazza han ins rabaglià sut controlla suenter paucs dis grazia a l'infrastructura da stizzar fieu gia bain equipada e grazia als acturs scolads cun experientscha. Ma è il Grischun preparà bain avunda per il futur, per pudair prevegnir uschè bain sco pussaivel ad incendis da guaud e per pudair cumbatter cun success cunter fieus en l'entir chantun? Questa dumonda ha tschentà l'uffizi da guaud e privels da la natira. Gist la stad 2018 ch'è stada extremamain sitga ha mussà en moda impressiunanta cun tge privel d'incendis da guaud ch'ins sto far quint en l'avegnir. Cun il concept qua avant maun "Prevenziun cunter incendis da guaud 2030" sa prepara il chantun Grischun – cun in pachet da mesiras equilibrà – per la ristga pli gronda d'incendis da guaud.

Dapli lieus da prelevaziun d'aua
Fin l'onn 2030 duain vegnir construids – per circa 19 milliuns francs – 66 novs batschigls u puzs d'aua da stizzar fieu sco er engrondids 8 lieus da prelevaziun d'aua existents per ch'i stettian a disposiziun a curta vista avunda reservas d'aua en cas d'incendi. Particularmain per ils guauds da protecziun impurtants sco er per las infrastructuras impurtantas duai vegnir meglierada respectivamain optimada la rait da disponibladad d'aua cun puzs artifizials sco er cun batschigls d'aua da stizzar fieu fixs e mobils. Ils lieus da prelevaziun d'aua servan a l'acziun svelta da stizzar fieu cun helicopters e silsuenter al cumbat sin terra cunter incendis.

Optimar l'organisaziun da las acziuns
Cun investiziuns da circa 1 milliun francs survegnan las basas da material existentas specificas per il cumbat cunter incendis da guaud ulteriur material da cumbat cunter il fieu. En l'avegnir sa stentan ils acturs principals pumpiers e servetsch forestal pli intensivamain per scolar il persunal sco er per optimar la lavur da prevenziun e d'infurmaziun.

Ina meglra infurmaziun a favur da la prevenziun
Quasi trais quarts da tut ils incendis da guaud èn chaschunads da l'uman. Perquai ha l'infurmaziun davart il privel d'incendis da guaud e davart il cumportament correct en cas da setgira in caracter fermamain preventiv. En l'avegnir survegn la prevenziun cunter incendis da guaud anc dapli impurtanza per pudair infurmar a temp, en moda simpla e chapaivla sco er resguardond las particularitads regiunalas da tut il chantun.

Sin la pagina d'internet al UGP stattan a disposiziun il rapport sco er fotografias per chargiar giu.


Infurmaziuns:
- cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- Reto Hefti, selvicultur chantunal, uffizi da guaud e privels da la natira, tel. 081 257 38 51, e-mail Reto.Hefti@awn.gr.ch

- cusseglier guvernativ Peter Peyer, schef dal departament da giustia, segirezza e sanadad, tel. 081 257 25 01, e-mail Peter.Peyer@djsg.gr.ch
- Hansueli Roth, inspectur da pumpiers, assicuranza d'edifizis dal Grischun, tel. 081 258 90 91, e-mail Hansueli.Roth@gvg.gr.ch


Gremi: departament da construcziun, traffic e selvicultura
departament da giustia, segirezza e sanadad
Funtauna: rg departament da construcziun, traffic e selvicultura
departament da giustia, segirezza e sanadad