En differentas destinaziuns turisticas dal Grischun han lieu questa stad var 50 curs da basa gratuits per noss giasts che han in velo da muntogna electric. En il rom dal project grischunE-MTB ed en collavuraziun cun las destinaziuns vegnan questas curtas scolaziuns purschidas a tut ils giasts da stad. Realisadas vegnan ellas da guids grischuns da velo da muntogna certifitgads.

Exercità vegni adina sonda da las 09.30 fin las 11.00. En questas lecziuns da velo da muntogna electric dattan ils swiss cycling guides grischuns paisa al pli impurtant en chaussas avair en maun il velo, segirezza, tecnicas d'ir cun velo ed en spezial d'ir cun velo da muntogna electric, ma er concernent scuntradas cun auters utilisaders da las sendas e vias da viandar. I sa participeschan Cuira, Arosa, Tavau, Claustra, Lai, Flem, Tusaun, Savognin, Scuol, Val Müstair, Landquart, Puntraschigna e Puschlav. Ils curs han gì lieu per l'emprima giada la stad 2018. Els han chattà in resun fitg positiv tar las participantas ed ils participants. "Grazia fitg per ils blers tips tecnics" u "Ussa sai jau che jau stoss duvrar transmissiuns pli pitschnas" èn mo dus aviss ch'èn vegnids exprimids en la runda da feetback. Detagls davart ils curs, davart termins, ulteriuras infurmaziuns e l'annunzia chattais Vus sut www.herbert.bike/fit-for-ebike.

Promover l'ir cun velo da muntogna electric en il chantun
En il rom dal project grischunE-MTB, il project successur "electrifitgà" da grischunBIKE, èn vegnidas definidas 13 mesiras per promover e per avanzar persistentamain l'ir cun velo da muntogna electric en il chantun. Questas mesiras vegnan ussa realisadas pass per pass. Ina da quellas ha la finamira da mussar a las participantas ed als participants a maun d'ina curta scolaziun, co ch'ins va enturn en moda segira cun in velo da muntogna electric. Cun questa purschida augmenta il Grischun sco regiun da vacanzas sias fermezzas ch'existan en il sectur dal velo da muntogna e prepara sasez sco er ils giasts per il tema autamain actual dal velo da muntogna electric.

grischunBIKE-GUIDES
La cuminanza d'interess dals swiss cycling guides grischuns s'engascha per ses guids e per lur activitads en il Grischun. La finamira è quella da promover questa professiun, d'engrondir la rait da contacts, d'infurmar e da realisar projects a favur dal sport da velo da muntogna e dal turissem. La cuminanza d'interess è ina fusiun dals guids da velo da muntogna che abitan en il Grischun e che han la scolaziun certifitgada da swiss cycling. L'avrigl 2018 han ils guids da velo da muntogna frequentà ina furmaziun supplementara specifica en il rom d'ina scolaziun da swiss cycling guide ch'è vegnida promovida da grischunE-MTB.


Infurmaziuns:
Claus Caluori, schef dal traffic betg motorisà, uffizi da construcziun bassa dal Grischun, tel. 081 257 37 21, e-mail Claus.Caluori@tba.gr.ch


Gremi: uffizi da construcziun bassa
Funtauna: rg uffizi da construcziun bassa