Las vischnancas responsablas duain vegnir sustegnidas er finanzialmain dal chantun en cas da la sanaziun da fermadas da bus tenor la lescha davart l'egualitad da persunas cun impediments. La regenza ha deliberà ina missiva per in credit d'impegn correspundent da 25 milliuns francs.

Per garantir a tut las gruppas da la populaziun l'access a meds da transport publics ston da princip tut las fermadas da bus resp. tut ils urs da perruns novs ed existents esser senza obstachels. En il chantun correspundan fin ussa mo paucas fermadas da bus a las pretensiuns da la lescha federala davart l'eliminaziun dals dischavantatgs envers persunas cun impediments (lescha davart l'egualitad da persunas cun impediments). Il termin per adattar edifizis e stabiliments existents è fixà a 20 onns suenter l'entrada en vigur da la lescha davart l'egualitad da persunas cun impediments. Pia scada el ils 31 da december 2023.

Il mars 2019 ha la regenza laschà elavurar in agid da lavur e da calculaziun per las vischnancas per adattar las fermadas da bus tenor la lescha davart l'egualitad da persunas cun impediments e fixà da princip che las vischnancas duain vegnir sustegnidas cun meds finanzials pli ampels per ademplir questa incumbensa. En ina missiva separada al cussegl grond dumonda la regenza ussa in credit d'impegn general da 25 milliuns francs per il subvenziunament previs da las adattaziuns architectonicas da las fermadas da bus tenor las directivas da la lescha davart l'egualitad da persunas cun impediments. Projects che concernan plazzas da fermada dal bus vi da vias chantunalas na furman betg ina part integrala da quest credit d'impegn general. Els vegnan finanziads sur la finanziaziun speziala "vias". La finamira da la promoziun pli ampla tras il chantun furma en quest connex la sanaziun a temp da las fermadas da bus fin la fin da l'onn 2023.

Il cussegl grond vegn a tractar il project probablamain en la sessiun da december 2019.

Agiunta:
missiva


Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: regenza
Funtauna: rg chanzlia chantunala dal Grischun