Cun in program chantunal vul la regenza rinforzar la politica d'uffants e da giuvenils en il chantun Grischun. Uffants e giuvenils duain vegnir sustegnids en lur svilup a commembers responsabels da la societad. Trais champs strategics d'acziun stattan en il center: promoziun, protecziun e participaziun. Cun ina finanziaziun da partenza vegn la confederaziun a sustegnair questa concepziun e la realisaziun da quest program chantunal.
Cun concepir e cun sviluppar vinavant la politica d'uffants e da giuvenils vul la regenza stgaffir cundiziuns da viver attractivas per famiglias, per uffants e per giuvenils. Ina promoziun d'auta qualitad promova il svilup d'uffants e giuvenils a commembers responsabels da la societad. La finamira è quella da garantir a tut ils uffants e giuvenils l'egualitad da las schanzas e protecziun, la prevenziun da la povradad e la promoziun da la sanadad, l'integraziun sociala, culturala e politica sco er l'acquisiziun pass per pass d'independenza, d'autonomia e da responsabladad sociala.
La rolla da la confederaziun e dal chantun en la politica d'uffants e da giuvenils
La responsabladad per uffants e per giuvenils è en emprima lingia chaussa da las persunas responsablas per l'educaziun. La constituziun chantunala attribuescha ina rolla da sustegn al chantun Grischun. Cun realisar il program "Politica d'uffants e da giuvenils en il chantun Grischun 2020–2022" duai ussa vegnir concretisada questa rolla.
Il program s'orientescha als trais champs d'acziun promoziun, protecziun e participaziun. Entaifer il chantun vegn la politica d'uffants e da giuvenils a vegnir sviluppada duraivlamain, en moda interdepartamentala ed en collavuraziun cun vischnancas e cun acturs privats. Per quest intent duai adina vegnir resguardada la diversitad linguistica, geografica e culturala dal chantun Grischun e renconuschida sco enritgiment.
La concepziun e l'ulteriur svilup da la politica d'uffants e da giuvenils survegnan durant 3 onns ina finanziaziun da partenza da la confederaziun. Tenor la lescha davart la promoziun da las activitads extrascolasticas dad uffants e giuvenils po la confederaziun conceder agids finanzials a programs chantunals sin quest champ.
Proxims pass
Il program chantunal vegn lantschà cun in'analisa dal stadi actual e dal basegn futur pertutgant la politica d'uffants e da giuvenils en il Grischun. A maun da questa analisa vegn la regenza a fixar mesiras che duain vegnir realisadas a partir da l'onn 2021.
Agiunta:
Program chantunal per la politica d'uffants e da giuvenils 2020–2022
Infurmaziuns:
cusseglier guvernativ Marcus Caduff, schef dal departament d'economia publica e fatgs socials, tel. 081 257 23 01, e-mail:
Marcus.Caduff@dvs.gr.ch
Gremi: regenza
Funtauna: rg chanzlia chantunala dal Grischun